ایپسٹین کو لکھے مبینہ فحش خط پر تنازع : ٹرمپ کا وال اسٹریٹ جرنل پر مقدمے کا اعلان

واشنگٹن: امریکی صدر ڈونلڈ ٹرمپ نے معروف اخبار وال اسٹریٹ جرنل پر مقدمہ کرنے کی دھمکی دے دی۔ یہ تنازع ایک 2003 کے مبینہ خط پر اٹھا ہے جو جیفری ایپسٹین کو سالگرہ کے موقع پر لکھا گیا تھا۔ اخبار نے رپورٹ کیا کہ مذکورہ خط میں ایک برہنہ خاتون کا خاکہ بنا ہوا تھا اور خاتون کے خاکے کی کمر کی نچلی جانب مبینہ طور پر ٹرمپ نے  اپنے دستخط کیے ہوئے تھے، جو نامناسب حرکت سمجھی گئی۔ تاہم ڈونلڈ ٹرمپ نے اس رپورٹ کی سختی سے تردید کرتے ہوئے کہا:"یہ میرا خط نہیں، یہ جعلی ہے۔ میں عورتوں کی تصویریں نہیں بناتا۔ یہ میری زبان نہیں، میرے الفاظ نہیں۔" صدر ٹرمپ نے اپنے سوشل میڈیا پلیٹ فارم "ٹروتھ سوشل" پر لکھا کہ انہوں نے اخبار کو پہلے ہی بتا دیا تھا کہ یہ خبر جھوٹی ہے، لیکن پھر بھی اسے شائع کیا گیا۔ انہوں نے کہا: "ہم جلد ہی وال اسٹریٹ جرنل، نیوزکارپ اور روپٹ مرڈوک پر مقدمہ کریں گے۔" ٹرمپ اس وقت ایپسٹین اسکینڈل پر تنقید کی زد میں ہیں۔ ناقدین کا دعویٰ ہے کہ ان کی انتظامیہ نے ایپسٹین کے معاملے میں بڑے بااثر افراد کو بچانے کی کوشش کی۔ یاد رہے، جیفری ایپسٹین 2019 میں نیویارک کی جیل میں مردہ پایا گیا تھا، اور حکام نے اسے خودکشی قرار دیا ہے۔ ایپسٹین کیس میں تفتیشی اداروں کا کہنا ہے کہ کوئی ’’کلائنٹ لسٹ‘‘ موجود نہیں، اور قتل کا کوئی ثبوت بھی نہیں ملا۔ اس کے باوجود، تنازع بڑھتا جا رہا ہے۔  

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل