کانگریس رہنما کا پاکستان کی حمایت میں بیان وائرل؛ مودی سرکار تلملا گئی

نئی دہلی: کانگریس کے سینئر رہنما منی شنکر کو آج کل اپنے ایک انٹرویو کے وائرل ہونے پر بھارتیہ جنتا پارٹی اور انتہا پسند ہندوؤں کی تنقید کا سامنا ہے۔

بھارتی میڈیا کے مطابق اپوزیشن جماعت کانگریس کے تامل ناڈو کے رہنما منی شنکر یائر کا ایک ویڈیو بیان وائرل ہو رہا ہے جس میں انھوں نے کہا بھارت کو پاکستان کے ساتھ بات چیت کرنا چاہئے ورنہ بھاری قیمت چکانا پڑسکتی ہے۔

منی شنکر نے مزید کہا کہ مودی سرکار مذاکرات کے بجائے فوجی طاقت بڑھانے پر توجہ مرکوز رکھی ہوئی ہے جس سے صرف کشیدگی بڑھے گی۔ پاکستان کے پاس ایٹمی بم ہیں اور وہ یہ بم بھارت پر گرا سکتا ہے۔

کانگریس رہنما نے مزید کہا کہ ایٹم بم تو ہمارے پاس بھی ہے لیکن ہمارے یہاں سے کسی ‘پاگل’ نے لاہور پر بم گرانے کا فیصلہ کیا تو اس کے تابکاری اثرات امرتسر تک پہنچنے میں صرف 8 سیکنڈ لگیں گے۔

خیال رہے کہ منی شنکر کا یہ بیان کافی پرانا ہے لیکن اس کے باوجود بھارتیہ جنتا پارٹی اور مودی سرکار کے وزرا تلملا اُٹھے ہیں جب کہ انتہا پسند ہندو سوشل میڈیا پر انھیں دھمکیاں بھی دے رہے ہیں۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل