صحافیوں کو اسرائیل کا خفیہ دورہ کرانا فلسطین کاز کے خلاف ہے، فلسطین فاؤنڈیشن

فلسطین فاؤنڈیشن نے غزہ کے مظلوم بچوں کی یاد میں کراچی کے علاقے کلفٹن تین تلوار میں احتجاج کیا اور کہا کہ صحافیوں کو اسرائیل کا خفیہ دورہ کرانا فلسطین کاز کے خلاف ہے۔ فلسطین فاؤنڈیشن نے کلفٹن تین تلوار پر احتجاج کیا جہاں مختلف سیاسی اور مذہبی جماعتوں کے رہنما موجود تھے۔ سیکریٹری جنرل فلسطین فاؤنڈیشن ڈاکٹر صابر ابو مریم نے کہا کہ احتجاج غزہ کے مظلوم بچوں کی یاد میں کیا جا رہا ہے، اہلیان فلسطین عید کے روز بھی حالت جنگ میں ہیں۔ انہوں نے کہا کہ ملکی عوام اپنے فلسطینی بھائیوں کے ساتھ ہیں، احتجاج کا مقصد اپنے مظلوم فلسطینی بھائیوں سے اظہار یک جہتی ہے، ہماری خوشی و غم مظلوم فلسطینیوں کے ساتھ ہے۔ ڈاکٹر صابر ابو مریم کا کہنا تھا کہ ملک میں اسرائیلی دہشت گردی کی مذمت کرتے ہیں، ملک خداداد پاکستان میں فلسطینی کاز کے خلاف سازش ہو رہی ہے، چند صحافیوں کو اسرائیل کے خفیہ دورے کرانا فلسطین کاز کے خلاف ہے۔ ان کا کہنا تھا کہ حکومت اور صحافتی تنظیمیں اسرائیل دورہ کرنے والوں کے خلاف ایکشن لیں، بانی پاکستان قائد اعظم محمد علی جناح نے اسرائیل کو خطے میں ناجائز ریاست کا واضح پیغام دیا ہے۔ رہنما فلسطین فاؤنڈیشن کا کہنا تھا کہ بانی پاکستان کا اسرائیل کو تسلیم نہ کرنے کا واضح مؤقف رہا، آج عید کے دن اپنی خوشیوں میں اپنے فلسطینی بھائیوں کو یاد رکھیں۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل