انجلی راگھو نے پون سنگھ کے خلاف ’’نامناسب انداز سے چھونے‘‘ کا کیس واپس لے لیا

بھارتی اداکارہ انجلی راگھو اور گلوکار پون سنگھ کے درمیان جاری تنازع میں نیا موڑ سامنے آگیا ہے، جہاں اداکارہ نے اپنی شکایت واپس لینے کا فیصلہ کر لیا ہے۔ میڈیا رپورٹس کے مطابق انجلی راگھو 2 اپریل کو فرید آباد میں ہریانہ اسٹیٹ ویمنز کمیشن کے سامنے پیش ہوئیں، جہاں انہوں نے واضح طور پر بتایا کہ وہ پون سنگھ کے خلاف کیس کو مزید آگے نہیں بڑھانا چاہتیں۔ اس موقع پر پون سنگھ خود موجود نہیں تھے۔ حکام کے مطابق اداکارہ کا یہ فیصلہ اس وقت سامنے آیا جب پون سنگھ نے سوشل میڈیا پر عوامی معافی مانگی، جس کے بعد کمیشن نے ان کا نام شکایت سے خارج کر دیا۔ تاہم معاملہ مکمل طور پر ختم نہیں ہوا۔ انجلی راگھو نے اپنے بیان میں پون سنگھ کی سوشل میڈیا ٹیم کے بعض افراد پر سنگین الزامات بھی عائد کیے۔ ان کا کہنا تھا کہ ان کی تصاویر اور ویڈیوز کو غلط انداز میں آن لائن شیئر کیا گیا، جس سے ان کی ساکھ متاثر ہوئی۔ اداکارہ نے مزید دعویٰ کیا کہ ان کا ذاتی نمبر اور تصاویر نامناسب ویب سائٹس پر بھی پھیلائی گئیں، جس کے باعث انہیں شدید ذہنی اذیت کا سامنا کرنا پڑا۔ انہوں نے ٹیم سے وابستہ تین افراد کے نام بھی لیے اور ان کے خلاف سخت کارروائی کا مطالبہ کیا۔ حکام نے متعلقہ افراد کو جواب جمع کروانے کی ہدایت دے دی ہے، جبکہ کیس کی اگلی سماعت 6 اپریل کو پنچکولہ میں مقرر کی گئی ہے، جہاں نامزد افراد کو پیش ہونے کا کہا گیا ہے۔ یہ تنازع اس وقت شروع ہوا تھا جب لکھنؤ میں ایک عوامی تقریب کے دوران دونوں فنکار ایک گانے کی تشہیر کے لیے موجود تھے۔ اسٹیج پر پون سنگھ نے اداکارہ کو سب کے سامنے نامناسب انداز سے ہاتھ لگایا تھا جس کی ویڈیوز بھی وائرل ہوئی تھیں۔ اس موقع پر انجلی راگھو نے مؤقف اختیار کیا تھا کہ بغیر اجازت کسی کا چھونا ناقابل قبول ہے اور وہ اس معاملے پر شدید پریشان رہی ہیں۔ فی الحال کیس دیگر نامزد افراد کے خلاف زیرِ سماعت ہے اور قانونی کارروائی جاری ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل