ایرانی عوام کے اتحاد نے امریکا اسرائیل کے منصوبے ناکام بنادیے، حزب اللہ سربراہ کا بڑا دعویٰ

بیروت: حزب اللہ کے سیکریٹری جنرل شیخ نعیم قاسم نے دعویٰ کیا ہے کہ ایران کے خلاف امریکا اور اسرائیل کی فوجی کارروائیاں ایرانی عوام کے اتحاد اور مختلف طبقات کی مضبوط مزاحمت کے باعث اپنے مقاصد حاصل کرنے میں ناکام رہیں۔ پریس ٹی وی کے مطابق شیخ نعیم قاسم نے ہفتہ وحدت کے موقع پر خطاب کرتے ہوئے ایران کے عوامی اتحاد اور ثابت قدمی کو سراہا۔ انہوں نے کہا کہ دشمنوں کے منصوبوں کو ناکام بنانے کے لیے مزاحمت اور ثابت قدمی بنیادی اہمیت رکھتی ہے۔ حزب اللہ سربراہ نے دعویٰ کیا کہ امریکا اور اسرائیل ایران کے خلاف تین جنگی مراحل میں اپنے مقاصد حاصل نہیں کرسکے۔ ان کے مطابق ایرانی قوم کے اتحاد اور مزاحمت نے امریکا اور اسرائیل کی کارروائیوں کو ناکام بنانے میں اہم کردار ادا کیا۔ نعیم قاسم نے اپنے خطاب میں جون 2025 اور فروری 2026 میں امریکا اور اسرائیل کی جانب سے ایران کے خلاف مشترکہ فوجی کارروائیوں کا حوالہ دیا۔ انہوں نے جولائی میں ایران پر ہونے والے امریکی حملوں کو بھی اس سلسلے کا ایک حصہ قرار دیا۔ حزب اللہ کے سربراہ کا کہنا تھا کہ جب تک لوگ اپنے حقوق، وطن اور خودمختاری کے دفاع کے لیے ثابت قدم رہتے ہیں، دشمن اپنے مقاصد حاصل نہیں کرسکتا۔ انہوں نے کہا کہ مشکلات، قربانیوں اور جانی نقصانات کے باوجود مزاحمت جاری رکھنے سے دشمن کی منصوبہ بندی اور عزائم کو ناکام بنایا جاسکتا ہے۔ شیخ نعیم قاسم نے ایرانی معاشرے کے مختلف طبقات کی مزاحمت اور یکجہتی کو اہم قرار دیتے ہوئے کہا کہ ایران کے خلاف فوجی دباؤ کے باوجود عوامی اتحاد برقرار رہا۔ ان کا بیان ایسے وقت میں سامنے آیا ہے جب ایران اور امریکا و اسرائیل کے درمیان حالیہ فوجی کشیدگی کے اثرات اب بھی خطے کی سکیورٹی صورتحال پر نمایاں ہیں۔ حزب اللہ کی جانب سے ایران کے ساتھ یکجہتی کے اظہار اور امریکا و اسرائیل کی کارروائیوں پر تنقید سے خطے میں جاری سیاسی اور فوجی کشیدگی مزید نمایاں ہوگئی ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل