مطالبات پورے ہونے تک اسلام آباد میں بیٹھیں گے، رہنما پی ٹی آئی

پاکستان تحریک انصاف کے مرکزی سیکریٹری اطلاعات نے کہا ہے کہ مطالبات پورے ہونے تک اسلام آباد میں بیٹھیں گے اور حکومت پہلے مطالبات مانے تو پھر کوئی دوسری بات ہوگی۔  پی ٹی آئی کے مرکزی سیکریٹری اطلاعات  شیخ وقاص اکرم  نے  پروگرام سینٹر اسٹیج میں گفتگو کرتے ہوئے کہا کہ ایسی باتیں سراسر  بے بنیاد ہیں کہ بانی پی  ٹی آئی کی اہلیہ بشریٰ بی بی  پارٹی میں کوئی  کردار لینے جا رہی ہے، بانی پی ٹی آئی  سے  آخری  بار جیل  میں ملاقات  ان کی اہلیہ بشری بی بی کی ہوئی تھی  انہوں  نے بانی پی ٹی آئی کا پیغام دیا  جبکہ گزشتہ روز کا اجلاس بیرسٹر گوہر کی صدارت میں ہوا تھا۔ انہوں نے واضح کیا کہ  وزیر اعلیٰ علی امین گنڈا پور  کے پی سے قافلوں کو لیڈ کریں گے۔ مرکزی سیکریٹری اطلاعات  پی ٹی آئی  نے کہا کہ ہر ضلع سے لوگ احتجاج کے لیے نکلیں گے،  جب تک مطالبات پورے نہیں ہوں گے اسلام آباد میں بیٹھے رہیں گے، پہلے مطالبات مانیں گے پھر حکومت سے کوئی دوسری بات کریں گے۔ شیخ وقاص اکرم نے کہا کہ ہم تو اب مذاکرات کرنا بھی نہیں چاہتے، ہم  بھر پور احتجاج کریں گے، ڈو اور ڈائی کا مطلب یہ نہیں کہ ہم  کسی کی جان  لینے جا رہے ہیں بلکہ ہمارا احتجاج پُرامن ہوگا، ہمارے لوگ کوئی  مسلح تو نہیں ہوں گے ، کفن  باندھنے کا مطلب  سفید رنگ کا کپڑا ہے جو کہ امن  کی علامت ہے۔ ان کا کہنا تھا کہ  اب تو ہمارے ورکرز بھی سوال کرتے ہیں اور احتجاج کرنے کا کہتے ہیں، سونے پہ سہاگہ یہ کہ اب تو  بانی پی ٹی آئی نے  بھی کال دے دی ہے ۔ پولیس والے اور ان کی فیملیز والے  بھی ہمارے ووٹرز ہیں، پولیس کے نوجوان بھی ہمیں نہیں روکیں گے ، ملک اور ان  ہی  کے لیے نکل رہے ہیں۔ شیخ وقاص اکرم نے کہا کہ حتمی کال کا مطلب یہ ہے کہ پوری تیاری کر کے آ ئیں، میرے پاس ہمارے  ہر احتجاج کا ڈیٹا موجود ہے، جو زیادہ بندے نکالے گا  وہی زیادہ محبت کا حق دار ہو گا اور اسی  حساب سے کل کو اسے ذمہ داری دی جائے گی۔ ان کا کہنا تھا کہ ملک کی سب سے بڑی سیاسی جماعت کے  مینڈیٹ پہ ڈاکا ڈالا  گیا، احتجاج کی دعوت  عوام  کو ہے پی ٹی آئی کے کروڑوں ووٹرز کو احتجاج کی دعوت دے رہے ہیں، یہ سب ووٹرز 24 نومبر کو سرپرائز دیں گے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل