-
-
-
Loading
Loading
آئی سی سی چیمپیئنز ٹرافی میں نیوزی لینڈ کی ٹیم بنگلا دیش کے خلاف آج میدان میں اترے گی، بنگال ٹائیگرز کیویز کو حیران کرنے کا خواب دیکھنے لگے، میگا ایونٹ کے گروپ اے کا یہ میچ میں راولپنڈی اسٹیڈیم میں کھیلا جائے گا۔ پاکستان کے بعد کیویز جہاں بنگال ٹائیگرز کو بھی زیر کر کے سیمی فائنل میں اپنی جگہ پکی کرنے کے لیے پْرعزم ہیں وہیں بنگلا دیش کے لیے یہ میچ انتہائی اہمیت کا حامل ہے کیونکہ شکست کی صورت میں اس کے سیمی فائنل میں پہنچنے کے امکانات ختم ہو سکتے ہیں۔ نیوزی لینڈ نے اپنے پہلے میچ میں پاکستان کو 60 رنز سے شکست دے کر ایونٹ میں شاندار آغاز کیا اور 1.200 کے نیٹ رن ریٹ کے ساتھ گروپ اے میں سرفہرست ہے، اگر کیوی ٹیم یہ میچ جیت جاتی ہے تو وہ سیمی فائنل میں جگہ بنانے کے مزید قریب پہنچ جائے گی۔ بنگلا دیش کو بھارت کے ہاتھوں اپنے پہلے میچ میں 6 وکٹوں سے شکست کا سامنا کرنا پڑا تھا۔ سیمی فائنل کی دوڑ میں جگہ برقرار رکھنے کے لیے اسے ہر صورت یہ میچ جیتنا ہوگا۔ نیوزی لینڈ نے اپنے ابتدائی میچ میں بھرپور کارکردگی کا مظاہرہ کیا اور حالیہ سہ فریقی سیریز میں کامیابی کے بعد پاکستانی کنڈیشنز سے اچھی طرح ہم آہنگ ہو چکا ہے۔ مزید پڑھیں؛ چیمپیئنز ٹرافی میچز؛ اسلام آباد میں کون سے راستے بند رہیں گے؟ ٹیم مینجمنٹ کے لیے رچن رویندرا کی ممکنہ واپسی ایک مشکل انتخاب بن سکتی ہے، ان کی غیر موجودگی میں ڈیوون کونوے اور ول ینگ نے اوپننگ کی تھی، خاص طور پر ینگ نے پاکستان کے خلاف سنچری بنا کر اپنی جگہ مضبوط بنا لی ہے، ایسے میں اگر رویندرا کو شامل کیا جاتا ہے تو کسی اور کھلاڑی کو باہر بٹھانا ہوگا جو ٹیم انتظامیہ کے لیے ایک بڑا فیصلہ ہوگا۔ بنگلا دیش کو بھارت کے خلاف میچ میں بیٹرز کی ناقص کارکردگی کا خمیازہ بھگتنا پڑا، اگر جاکر علی اور توحید ہردوئے کی 154 رنز کی شراکت نہ ہوتی تو ٹیم 100 رنز کا ہندسہ بھی عبور نہ کر پاتی۔ کپتان نجم الحسن شانتو نے ٹاس جیتنے کے باوجود فائدہ نہیں اٹھایا جبکہ ناقص فیلڈنگ بھی ٹیم کے لیے نقصان دہ ثابت ہوئی۔ کرکٹ مبصرین کے مطابق اگر بنگلا دیش کو نیوزی لینڈ کے خلاف کامیابی حاصل کرنی ہے تو بیٹرز کو ذمہ داری لینا ہوگی اور فیلڈنگ میں بھی بہتری لانا ہوگی۔ بنگلا دیش کے لیے حوصلہ افزا بات یہ ہے کہ 2017 کی چیمپیئنز ٹرافی میں بھی اس نے نیوزی لینڈ کو حیران کن شکست دے کر ایونٹ سے باہر کر دیا تھا۔ ٹیم اسی جذبے کے ساتھ میدان میں اترے گی کہ وہ ایک بار پھر کیویز کو حیران کر کے سیمی فائنل کی امیدیں برقرار رکھ سکے۔
اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔
مزید تفصیل