شدید ردعمل کے بعد وہاب ریاض کا نیشنل ٹی 20 کپ سے دستبرداری کا فیصلہ

پی سی بی ہیڈ آف مینٹورز اور سابق پاکستانی فاسٹ بولر وہاب ریاض نے شدید تنقید کے بعد نیشنل ٹی 20 کپ نہ کھیلنے کا فیصلہ کر لیا۔ وہاب ریاض نے اپنے فیصلے سے پی سی بی ڈومیسٹک ڈیپارٹمنٹ اور لاہور ریجن ایسوسی ایشن انتظامیہ کو آگاہ کردیا۔ وہاب ریاض کی جگہ نوجوان فاسٹ باؤلر احمد بشیر کو لاہور وائٹس کے 15 رکنی اسکواڈ میں شامل کر لیا گیا ہے۔ لاہور واٹس میں وہاب ریاض کی شمولیت پر سوشل میڈیا پر شدید ردعمل سامنے آیا تھا۔ سابق کرکٹرز سمیت کئی افراد نے اسے نوجوان کھلاڑیوں کے حق پر ڈاکہ قرار دیا تھا۔   سوشل میڈیا پر ایک صارف نے لکھا:   "پاکستان کرکٹ بورڈ کا حال دیکھیں، ایک ریٹائرڈ بولر کو سرکاری تعلقات کی بنیاد پر نیشنل ٹی 20 کھیلنے دیا جا رہا ہے۔ یہی وجہ ہے کہ ہماری کرکٹ تنزلی کا شکار ہے!"   واضح رہے کہ 39 سالہ وہاب ریاض نے 2020 میں پاکستان کے لیے اپنا آخری انٹرنیشنل میچ کھیلا تھا۔ وہاب ریاض لاہور ریجن کرکٹ ایسوسی ایشن کے ٹرائل میچ میں اچھی کارکردگی دکھا کر ٹیم میں شامل ہوئے تھے۔   لاہور گرینز کی نمائندگی کرتے ہوئے وہاب نے تین اوورز میں 25 رنز دے کر ایک وکٹ حاصل کی جبکہ بیٹنگ میں 31 رنز کی برق رفتار اننگز کھیلی جس میں تین چھکے شامل تھے۔  وہاب ریاض نے حال ہی میں پی سی بی کا لیول-2 کوچنگ کورس مکمل کیا اور کچھ عرصے کے لیے قومی سلیکٹر کے طور پر بھی خدمات انجام دیں۔   دوسری جانب نیشنل ٹی20 کپ میں کراچی وائٹس اپنی ٹائٹل کا دفاع کرے گی، جبکہ ٹورنامنٹ کا آغاز رواں ماہ کے آخر میں ہوگا۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل