سندھ اسمبلی میں ٹرین حملے اور پاک فوج کو خراج تحسین پیش کرنے کی قرارداد منظور

قومی اسمبلی کے بعد سندھ اسمبلی میں بھی بلوچستان میں ٹرین پر حملے اور مسافروں کو یرغمال بنائے جانے کے خلاف مذمتی قرارداد متفقہ طور پر منظور کرلی گئی۔ سندھ اسمبلی میں یہ قرارداد مشترکہ طور پر حکومتی اور اپوزیشن ارکان نے پیش کی تھی۔ جس میں دہشت گرد حملے کی شدید الفاظ میں مذمت کی گئی ہے۔ قرارداد میں یرغمالی مسافروں کی بحفاظت بازیابی کے لیے کیے گئے ملٹری آپریشن کے دوران وطن عزیز اپنی جانوں کے نذرانے پیش کرنے والے جوانوں کو خراج تحسین پیش کیا گیا۔ قرارداد میں حادثے میں جاں بحق ہونے والے معصوم شہریوں کے ساتھ اظہارِ یکجہتی کا اظہار کرتے ہوئے کہا کہ غم زدہ خاندانوں کی دکھ کی اس گھڑی میں ان کے ساتھ کھڑے ہیں۔ سندھی اسمبلی کی قرارداد میں دہشت گردی کے خلاف بلا تفریق منظم ہونے اور وطن عزیز کے دفاع کے عزم کا اعادہ کیا ہے۔ یہ خبر بھی پڑھیں : جعفر ایکسپریس حملے کا مرکزی اسپانسر بھارت ہے، ڈی جی آئی ایس پی آر قرارداد میں کہا گیا ہے کہ دہشت گردی سے نمٹنے کے لیے پاک فوج اور حکومت ہمہ وقت چوکنے ہیں۔ ایک ایک انچ سرزمین کی حفاظت کریں گے۔ یاد رہے کہ 11 مارچ کو کوئٹہ سے پشاور جانے والی جعفر ایکسپریس پر دہشت گردوں نے حملہ کرکے 440 مسافروں کو یرغمال بنالیا تھا۔ جس کے جواب میں پاک فوج کے کلیئرنس آپریشن میں تمام 33 دہشت گردوں کو ہلاک کردیا گیا تھا جب کہ 21 مسافر اور جوان بھی شہید ہوئے۔    

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل