پاکستان میری ٹائم سیکیورٹی ایجنسی کا کھلے سمندر میں آپریشن، ایک ارب روپے مالیت کی منشیات برآمد

پاکستان میری ٹائم سیکیورٹی ایجنسی نے مشترکہ آپریشن کے دوران کھلے سمندر سے 500 کلوگرام سے زائد چرس، کرسٹل آئس (میٹھ ایمفیٹامین) اور شراب برآمد کرلی، منشیات کی مجموعی مالیت ایک ارب روپے کے لگ بھگ ہے۔ ترجمان پاکستان میری ٹائم سیکیورٹی ایجنسی کے مطابق پاکستان نیوی، جوائنٹ میری ٹائم انفارمیشن اینڈ کورڈینیشن سینٹر اور محکمہ ایکسائز، ٹیکسیشن و نارکوٹکس کنٹرول نے بحیرہ عرب میں کامیابی سے ایک اہم مشترکہ میری ٹائم اور انٹیلیجنس بیسڈآپریشن مکمل کیا، نگرانی اور مربوط میری ٹائم گشت کے دوران ایک غیر ریاستی کشتی کو روکا گیا اور اس کی تلاشی لی گئی،جس میں 500 کلوگرام سے زائد چرس اور کرسٹل آئس (میٹھ ایمفیٹامین) برآمد ہوئی۔ ترجمان پی ایم ایس اے کے مطابق ایک اور کارروائی کے دوران ایک انٹیلیجنس بیسڈ آپریشن کے نتیجے میں غیر قانونی شراب بھی برآمد کی گئی جو کہ غیرقانونی ترسیل کےلیے چھپائی گئی تھی۔ اس کامیاب آپریشن کا سہرا بروقت انٹیلیجنس شیئرنگ، حقیقی وقت میں کوآرڈینیشن اور اداروں کے درمیان مکمل ہم آہنگی کوجاتا ہے، برآمد شدہ منشیات کی مجموعی مالیت ایک ارب پاکستانی روپے سےزائد بتائی گئی ہےجو کہ منشیات کی اسمگلنگ اور اسمگلنگ نیٹ ورکس کےلیے بڑا دھچکہ ہے۔ تمام ضبط شدہ اشیاء کو محکمہ ایکسائز، ٹیکسیشن و نارکوٹکس کنٹرول (سندھ) کےحوالےکردیا گیا تاکہ مزید تحقیقات اور قانونی کارروائی عمل میں لائی جاسکے، یہ آپریشن پاکستان کی میری ٹائم اور قانون نافذ کرنے والے اداروں کے مابین مضبوط تعاون اور ہم آہنگی کا مظہر ہے اور اسمگلنگ کےخلاف عزم، قومی سمندری حدود کے تحفظ اور علاقائی سلامتی کے لیے ان کے مشترکہ عزم کی عکاسی کرتا ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل