پاکستانی زائرین کیلیے انفرادی حیثیت میں عراق جانے پر پابندی

عراق اور ایران جانے کے خواہش مند پاکستانیوں پر گروپ آرگنائزر کے  بغیر داخلے پر پابندی عائد کردی گئی، ایران، عراق اور پاکستان نے زیارتوں کے حوالے سے مشترکہ ورکنگ گروپ تشکیل دینے کا بھی فیصلہ کیا ہے۔ ایکسپریس نیوز کے مطابق ایران کے دارالحکومت تہران میں پاکستان، ایران اور عراق کے وزرائے داخلہ کی سہ ملکی کانفرنس کا انعقاد کیا گیا۔ جس میں ایران اور عراق جانے والے پاکستانی زائرین کی  سہولت کیلئے ہر ممکن اقدام پر اتفاق کیا گیا۔ اجلاس میں زائرین کی سہولت کیلئے پاکستان، ایران اور عراق کا مشترکہ ورکنگ گروپ تشکیل دینے کا فیصلہ بھی کیا گیا۔ وفاقی وزیرداخلہ محسن نقوی نے سہ ملکی کانفرنس سے خطاب کرتے ہوئے کہا کہ پاکستان کی درخواست پر زائرین کے مسائل کے حل کیلئے سہ ملکی کانفرنس کے انعقاد پر ایرانی وزیر داخلہ سکندر مومنی کا شکریہ ادا کرتا ہوں۔ انہوں نے کہا کہ عراق اور ایران جانے والے زائرین ہمارے لیے بہت اہم ہیں اور سہ ملکی کانفرنس سے  عراق و ایران جانے والے زائرین کو مزید سہولت ملے گی۔ محسن نقوی نے کہا کہ جنوری 2026 سے  صرف وہی لوگ انفرادی طور پر عراق جاسکیں گے جنہیں سفارتخانہ خصوصی ویزا جاری کرے گا، گروپ آرگنائزرز کے سسٹم سے غیر قانونی عراق جانے والوں اور زائد قیام کے رجحان کا خاتمہ ہو گا۔ وزیر داخلہ نے کہا کہ عراق اور ایران بھی پاکستان کے اس نئے نظام کے ساتھ ہیں، ہم نے مشترکہ اقدامات سے مل کر غیر قانونی طور پر عراق جانے والوں اور وہاں زائد قیام کرنے والوں کو ہر صورت روکنا ہے۔ انہوں نے پاکستان کے زائرین کی دیکھ بھال پرعراق اور ایران کی حکومتوں کا شکریہ ادا کرتے ہوئے کہا کہ لاکھوں زائرین کا خیال رکھنا بہت بڑا چیلنج ہے اور دونوں وزرائے داخلہ یہ ذمہ داری خوش اسلوبی سے ادا کر  رہے ہیں۔ محسن نقوی نے جنگ میں شاندار فتح پر ایران اور ایرانی  وزیر داخلہ کو مبارکباد دیتے ہوئے کہا کہ پاکستان نے ایران پر حملے کی کھل کر مذمت کی اور ایران کے حق دفاع کو مکمل طور پر سپورٹ کیا۔ انہوں نے کہا کہ جنگ کے دوران پاکستانی عوام ایرانی عوام کے ساتھ کھڑے رہے، پاکستان اور ایران بھائی ہیں اور ہمیشہ بھائی رہیں گے۔ انہوں نے کہا کہ وزیر اعظم پاکستان اور دیگر اعلی حکام  نے جنگ میں انتہائی متحرک و مثبت کردار ادا کیا، جو وہ کر سکتے تھے انہوں نے وہ بہترین کردار ایران کے لئے ادا کیا، پاکستان میں ایران کے سفیر امیری مقدم یہاں موجود ہیں اور یہ اس بات کے گواہ ہیں۔ حسن نقوی نے کہا کہ ایران کے سپریم لیڈر آیت اللہ خامنہ ای  جنگ کے دوران مضبوطی سے کھڑے رہے اور جرات کے ساتھ لیڈ کیا، آیت اللہ خامنہ ای اور ایرانی عوام کو عظیم فتح پر مبارکباد دیتے ہیں ۔ ایران کے نائب وزیر داخلہ علی اکبر پور جمشیدیان، ایرانی وزیر داخلہ کے سینئر مشیر نادر یار احمدی، پاکستان میں ایران کے سفیر امیری مقدم۔ ایران میں پاکستان کے سفیر محمد مدثر ٹیپو۔ پاکستانی وزارت داخلہ کے سیکرٹری خرم آغا۔عراق کی وزارت داخلہ کے اعلی حکام کی بھی سہ ملکی کانفرنس میں شرکت کی۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل