ٹرمپ ایران جنگ کو باضابطہ طور پر ختم کرنے پر غور کرنے لگے، امریکی میڈیا کا دعویٰ

واشنگٹن: امریکی صدر ڈونلڈ ٹرمپ ایران کے ساتھ جاری جنگ کو باضابطہ طور پر ختم کرنے کے اعلان پر نجی طور پر غور کررہے ہیں جبکہ امریکی محکمہ دفاع نے مشرق وسطیٰ میں فوجی تعیناتیوں کو مزید بڑھانے کا فیصلہ کیا ہے۔ وال اسٹریٹ جرنل کے مطابق ٹرمپ نے اپنے سینئر معاونین کے ساتھ اس امکان پر بات کی ہے کہ آیا ایران کے ساتھ جنگ کو ختم کرنے کا اعلان کیا جائے۔ رپورٹ کے مطابق امریکی صدر اس اقدام کے حق میں ہیں اور سمجھتے ہیں کہ ایران پر مسلسل شدید معاشی دباؤ ڈالنے سے تہران کو اپنے جوہری پروگرام کو ختم کرنے یا معاشی طور پر شدید بحران کا سامنا کرنے پر مجبور کیا جاسکتا ہے۔ رپورٹ میں بتایا گیا ہے کہ امریکا نے گزشتہ ہفتے آپریشن اکنامک آؤٹ کاسٹ شروع کیا جس کے تحت ایران کے اہم معاشی شعبوں کو نشانہ بنایا جارہا ہے۔ ان میں تیل، بحری تجارت، ہوا بازی، سونا، ٹیکنالوجی اور ڈیجیٹل اثاثوں کے شعبے شامل ہیں۔ دوسری جانب پینٹاگون کی جانب سے مشرق وسطیٰ میں امریکی فوجی تعیناتیوں میں توسیع کی اطلاعات سامنے آئی ہیں۔ یوں ایک طرف جنگ ختم کرنے کے امکان پر غور کیا جارہا ہے تو دوسری جانب خطے میں امریکی فوجی موجودگی برقرار رکھنے اور معاشی دباؤ بڑھانے کی حکمت عملی بھی جاری ہے۔ رپورٹ کے مطابق ٹرمپ کا خیال ہے کہ مسلسل اقتصادی دباؤ ایران کو اپنے جوہری پروگرام کے حوالے سے بڑے فیصلے پر مجبور کرسکتا ہے۔ تاہم جنگ کے باضابطہ خاتمے اور امریکی فوجی تعیناتیوں کے مستقبل کے بارے میں حتمی فیصلہ ابھی سامنے نہیں آیا۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل