دوران پرواز بھارتی طیارے میں پاور بینک پھٹنے سے آگ بھڑک اٹھی، خوفناک ویڈیو وائرل

بھارت میں دورانِ پرواز پاور بینک میں آگ لگنے سے دہلی سے چنئی جانے والی انڈیگو ایئرلائن کی پرواز کو ہنگامی طور پر حیدرآباد اتارنا پڑ گیا واقعے کے وقت طیارہ 35 ہزار فٹ کی بلندی پر محوِ پرواز تھا۔ ایوی ایشن ذرائع کے مطابق انڈیگو کی پرواز 6E6115 میں مسافر کے اوور ہیڈ کمپارٹمنٹ میں رکھے پاور بینک سے اچانک آگ بھڑک اٹھی، جس سے طیارے میں ہنگامی صورت حال پیدا ہوگئی۔ کیبن کریو نے فوری کارروائی کرتے ہوئے آگ بجھانے والے آلے کی مدد سے شعلوں پر قابو پالیا، تاہم مسافروں کی حفاظت کے پیش نظر پائلٹس نے طیارے کا رخ حیدرآباد کے راجیو گاندھی انٹرنیشنل ایئرپورٹ کی جانب موڑ دیا۔ طیارے کی بحفاظت لینڈنگ کے بعد اسے گراؤنڈ کردیا گیا، جبکہ مسافروں کو متبادل طیارے کے ذریعے ان کی منزل چنئی پہنچانے کا انتظام کیا گیا۔ ایوی ایشن ذرائع کے مطابق پاور بینکس میں استعمال ہونے والی لیتھیم آئن بیٹریاں زیادہ گرم ہونے یا خراب ہونے کی صورت میں آگ پکڑ سکتی ہیں۔ اسی خطرے کے پیش نظر فضائی سفر کے دوران پاور بینک کو ہینڈ بیگیج میں رکھنے کو ترجیح دی جاتی ہے، تاکہ کسی ہنگامی صورت حال میں عملہ فوری کارروائی کرسکے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل