دلیر مہدی کی سرعام تذلیل پر انوپم کھیر برہم، فنکاروں سے حمایت کی اپیل

بالی وڈ کے سینئر اداکار انوپم کھیر نے پنجابی گلوکار دلیر مہدی کی حمایت کرتے ہوئے اتراکھنڈ کے کابینہ وزیر سُبودھ یونیال کے رویے پر سوال اٹھائے ہیں۔ ان کا کہنا ہے کہ اگر کسی فنکار کی پرفارمنس پسند نہ آئے تو اس پر اعتراض کیا جاسکتا ہے، لیکن عوام کے سامنے اس کی تذلیل کرنا کسی صورت مناسب نہیں۔ تنازع اس وقت شروع ہوا جب اتراکھنڈ کے علاقے ٹہری گڑھوال میں منعقدہ ماں کنجاپوری میلے کے دوران وزیر سُبودھ یونیال دلیپ مہندی کی پرفارمنس کے دوران اسٹیج پر پہنچ گئے۔ انہوں نے گلوکار پر شراب پی کر پرفارم کرنے کا الزام لگایا اور یہ سوال بھی کیا کہ وہ براہِ راست گا رہے ہیں یا ریکارڈ شدہ آواز پر صرف لب ہلا رہے ہیں۔ واقعے کی ویڈیو سوشل میڈیا پر وائرل ہوئی تو متعدد فنکاروں نے گلوکار کے حق میں آواز اٹھائی۔ انوپم کھیر نے بدھ کو انسٹاگرام پر اپنے پیغام میں بتایا کہ وہ دلیر مہدی کو تقریباً 30 برس سے جانتے ہیں اور ان کے کردار سے واقف ہیں۔ ان کے مطابق، گلوکار شراب نہیں پیتے اور وہ ایک بہترین انسان ہیں۔ کھیر نے یہ بھی بتایا کہ دلیر مہدی گزشتہ دو سے تین سال سے صحت کے مسائل کا سامنا کر رہے ہیں۔ ان کا خیال ہے کہ ممکن ہے گلوکار نے پہلے سے طے شدہ پیشہ ورانہ وعدے کی پاسداری کے لیے بیماری کے باوجود پروگرام میں شرکت کی ہو۔ انوپم کھیر نے کہا کہ اگر گلوکار نے ریکارڈ شدہ آواز پر پرفارم بھی کیا ہو، تب بھی کسی شخص سے اس انداز میں بات کرنا درست نہیں، خصوصاً جب اسے عوام کے سامنے شرمندہ کیا جائے۔ ان کے مطابق، کسی پر اس طرح الزام لگانا ناانصافی ہے۔ انہوں نے شوبز انڈسٹری کے دیگر افراد سے بھی اپیل کی کہ وہ دلیر مہدی کی حمایت میں آگے آئیں اور ساری ذمے داری ان کے بھائی میکا سنگھ پر نہ چھوڑیں۔ اپنی انسٹاگرام پوسٹ میں کھیر نے سوال کیا کہ اگر وزیر کو پرفارمنس پر اعتراض تھا تو وہ یہ بات نجی طور پر بھی کرسکتے تھے۔ انہوں نے یاد دلایا کہ دلیر مہدی نے گزشتہ 35 برس میں موسیقی کی دنیا میں نمایاں مقام بنایا ہے اور کسی بھی فنکار کی ساکھ برسوں کی محنت سے قائم ہوتی ہے۔ کھیر نے گلوکار کی پیشہ ورانہ صلاحیتوں پر اعتماد کا اظہار کرتے ہوئے ان کی جلد صحت یابی کی دعا بھی کی۔ میکا سنگھ نے اپنے بڑے بھائی کی حمایت کرتے ہوئے کہا کہ اگر دلیر مہدی کے شراب پینے کا الزام ثابت ہوجائے تو وہ گلوکاری چھوڑ دیں گے۔ کامیڈین اور میزبان کپل شرما اور گلوکار و ریپر بادشاہ نے بھی دلیر مہدی کی حمایت کی ہے۔ اداکار و کامیڈین ویر داس نے بھی بالواسطہ طور پر گلوکار کے حق میں بات کرتے ہوئے انہیں اپنے ساتھ کام کرنے والے مہربان فنکاروں میں سے ایک قرار دیا۔ دوسری جانب، وزیر سُبودھ یونیال نے اپنے اقدام کا دفاع کرتے ہوئے دعویٰ کیا کہ گلوکار کو پرفارمنس کے لیے 35 لاکھ بھارتی روپے ادا کیے گئے تھے، جبکہ سفر اور رہائش کے اخراجات الگ تھے۔ وزیر کے مطابق، گلوکار اسٹیج پر الجھے ہوئے دکھائی دے رہے تھے اور ان کی پرفارمنس ان کی شہرت کے معیار کے مطابق نہیں تھی۔ اس معاملے نے عوامی تقریبات میں فنکاروں کے ساتھ برتاؤ اور پرفارمنس پر اعتراض کرنے کے مناسب طریقے سے متعلق بحث چھیڑ دی ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل