کراچی: واٹر ٹینکر نے ایک اور ماں کی گود اجاڑ دی

بفرزون کے بی آر سوسائٹی میں واٹر ٹینکر کے پہیوں تلے کچل کر نوعمر لڑکا جاں بحق ہوگیا ، مشتعل مکینوں نے پتھراؤ کر کے واٹر ٹینکر کے شیشے توڑ دیے جبکہ پولیس نے ڈرائیور کو گرفتار کر کے ٹینکر قبضے میں لے لیا ،متوفی کی لاش ایدھی کے رضا کاروں نے عباسی شہید اسپتال پہنچائی۔  اس حوالے سے ایس ایچ او تیموریہ ثاقب خان نے بتایا کہ جان لیوا حادثہ بفرزون کے بی آر سوسائٹی بروہی گوٹھ میں پیش آیا جہاں واٹر ٹینکر پانی سپلائی کرنے آیا تھا اور ریورس کرتے ہوئے علاقے کا لڑکا پہیوں تلے آکر جاں بحق ہوگیا جس کی شناخت 10 سالہ صائم کے نام سے کی گئی جبکہ پولیس نے موقع پر پہنچ کر صورتحال پر قابو پاتے ہوئے ڈرائیور کو گرفتار کر کے ٹینکر اپنے قبضے میں لے لیا تاہم اس حوالے سے پولیس مزید تحقیقات کر رہی ہے۔ واٹر ٹینکر کے پہیوں تلے کچل کر زندگی بازی ہار نے والے نوعمر صائم کے اہلخانہ پر تو جیسے قیامت ہی ٹوٹ پڑی ، والدہ پر غشی کے دورے پڑنے لگے جبکہ علاقہ مکینوں کی بڑی تعداد متوفی کی رہائش گاہ پر جمع ہوگئی۔  اس موقع پر علاقے کی خواتین بھی شدت غم سے نڈھال ہوگئیں ، اہل محلہ کی جانب سے واقعے کی شدید الفاظ میں نہ صرف مذمت کی گئی بلکہ رہائشی علاقے میں قائم فیکٹریوں پر بھی اپنے تحفظات کا اظہار کیا جہاں واٹر ٹینکر پانی سپلائی کرنے آتے رہتے ہیں۔ مکینوں کا کہنا تھا کہ علاقے میں میٹھا پانی تو ناپید ہے اسی وجہ سے مکین فلٹر پلانٹ سے پینے کا پانی حاصل کرتے ہیں ، عباسی شہید اسپتال میں متوفی کے تایا عبدالرزاق نے بتایا کہ متوفی صارم 3 بہنوں اور 2 بھائیوں میں سب سے بڑا اور چوتھی کلاس کا طالبعلم تھا۔  انہوں نے مزید بتایا کہ علاقے میں فیکٹریوں میں واٹر ٹینکر آتے رہتے ہیں اور بچوں کو روزانہ ہی خطرے سے خود کو بچانا پڑتا ہے، حادثے کا ذمہ دار ٹینکر بھی فیکٹری میں پانی سپلائی کرنے آیا تھا ، متوفی صائم فلٹر پلانٹ سے پانی لینے گیا تھا کہ اس جان لیوا خونی حادثے کا شکار ہوگیا ، متوفی کے والد ریسٹورنٹ میں ملازمت کرتے ہیں۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل