ایچ بی ایل پی ایس ایل 10: کراچی کنگز نے اپنی تیاریوں کا آغاز کر دیا

پی ایس ایل 10 کے لیے کراچی کنگز نے اپنی تیاریوں کا آغاز کر دیا۔ کراچی کنگز نے پیر کو نیشنل اسٹیڈیم کے اوول گراؤنڈ پر اپنی ابتدائی مشقیں کیں۔ جمعہ سے شروع ہونے والے میگا ایونٹ میں کراچی کنگز اگلے روز ہفتے کو اپنا پہلا میچ نیشنل اسٹیڈیم میں ملتان سلطانز کے خلاف کھیلے گی۔ ایونٹ کے لیے ابتدائی روز فرنچائز میں شامل مقامی کرکٹرز نے تربیت کا آغاز کیا۔ان میں ٹیسٹ کپتان شان مسعود، فاسٹ بولر حسن علی، عامر جمال، عباس آفریدی ،زاہد محمود، فواد علی اور محمد ریاض اللہ سمیت دیگر شامل تھے۔ ابتدائی مشقوں میں ہیڈ کوچ روی بوپار اور اسسٹنٹ و بولنگ کوچ شان ٹیٹ نے کھلاڑیوں کی نگرانی کی۔ اس موقع پر بیٹنگ بولنگ اور فیلڈنگ کے شعبوں میں کارکردگی میں نکھار لانے کی کوشش کی گئی۔ دورہ نیوزی لینڈ میں پاکستان کی نمائندگی  کے بعد واپس وطن پہنچنے والے فرنچائز کے کھلاڑی اگلے دو دن میں اسکواڈ کا حصہ بن جائیں گے۔ ان میں نیوزی لینڈ میں افغان باشندے کی بدتمیزی کا شکار ہونے والے ممتاز آل راؤنڈر خوش دل شاہ خصوصی توجہ کا مرکز ہوں گے۔ فرنچائز کے آل راؤنڈر افغانستان سے تعلق رکھنے والے محمد نبی منگل کو کراچی پہنچ رہے ہیں۔کراچی کنگز کے نامزد کپتان معروف آسٹریلوی بیٹر ڈیوڈ وارنر جمعرات کو پاکستان پہنچیں گے۔ دریں اثنا پی ایس ایل 10 میں کراچی کنگز کے خلاف اپنا پہلا میچ کھیلنے کے لیے ملتان سلطانز کی ٹیم منگل کی شب کراچی پہنچ رہی ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل