کراچی: ڈاکٹر شاہ فائیو اے سائیڈ ویمنز ہاکی ٹورنامنٹ کا انعقاد

کے ایچ اے ویمن ونگ کے تحت  کے ایچ اے  اسپورٹس کمپلیکس کے آسٹرو ٹرف  پر ڈاکٹر شاہ فائیو اے سائیڈ ویمنز ہاکی ٹورنامنٹ کا انعقاد ہوا۔ فائنل میں لائنسز آف دی فیلڈ نے پرل پاینئرز کو3-5 سے شکست دے کر ٹائٹل اپنے نام کر لیا۔ اس موقعہ پر ڈاکٹر سید عمران علی شاہ مہمان خصوصی تھے جبکہ تقریب کی صدارت سندھ حکومت کے سیکریٹری اسپورٹس عبد العلیم لاشاری نے کی۔ مہمان خصوصی ڈاکٹر سید عمران علی شاہ کاکہنا تھاکہ لڑکیاں بھی کھیل کے میدان میں کسی سے کم نہیں ہیں،اپنے والد ڈاکٹر سید محمد علی شاہ مرحوم کی پیروی کرتے ہوئے ہاکی کے فروغ میں اپنا کردار ادا کرتے رہیں گے۔ سیکریٹری اسپورٹس عبدالعلیم لاشاری نے کےایچ اے کی خدمات کو سراہتے ہوئے بھرپور تعاون جاری رکھنے کی یقین دہانی کرائی اور کہا  کہ زیر تعمیر ہوسٹل اپنے مقررہ وقت پر مکمل ہو جائے گا۔ کے ایچ اے کے صدر امتیازعلی شاہ نے کہا کہ کے ایچ اے میں ہاکی کی سرگرمیاں عروج پر ہیں۔خوبصورت گراونڈ کا تمام تر سہرا سابق صدرکے ایچ اے ڈاکٹر جنید علی شاہ کو جاتا ہے جنہوں نے اپنے والد کی کھیلوں میں خدمات کے سلسلے کو جاری رکھا۔ کے ایچ اے ویمنز ونگ کی صدر اسماء علی شاہ نے کہا کہ سید امتیازعلی شاہ کا بطور صدر کے ایچ اے سے جڑنا کراچی میں ہاکی کی کامیابی کی ضمانت ہے،ویمن ہاکی کے فروغ کے لیے ہر ممکن کاوش کی جائے گی۔ تقریب میں سابق رکن قومی اسمبلی  ریحان ہاشمی،  کے ایچ اے کے سیکریٹری اولمپین حنیف خان، اولمپین کلیم اللہ، اولمپین افتخار سید، اولمپین وسیم فیروز، اولمپین ناصرعلی ، قومی ٹیم کے سابق انٹرنیشنل گول کیپر کوچ عبدالغفور، قومی ویمنز ٹیم کے کوچ محمد نعیم ،کے ایچ اے کی سیکرٹری ویمن ونگ بتول کاظم ، صغیر حسین اور دیگر بھی موجود تھے۔ ثمینہ تبسم،ندا انجم،ماہ نور،ریجا معیز،حمنا ندیم،ایمان اور گلناز غلام نبی نے ایمرجنگ ویمن پلئیرز کے ایوارڈز حاصل کیے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل