برطانیہ میں فلسطین ایکشن گروپ کی حمایت پر کریک ڈاؤن، 41 سے زائد افراد گرفتار

برطانیہ میں فلسطین ایکشن گروپ کی حمایت کے الزام میں پولیس نے کارروائی کرتے ہوئے پارلیمنٹ اسکوائر سے 41 سے زائد افراد کو گرفتار کر لیا۔ گرفتار ہونے والوں میں خواتین، بزرگ شہری اور طلبا شامل ہیں۔ برطانوی میڈیا کے مطابق حکومتِ برطانیہ نے فلسطین ایکشن گروپ کو پہلے ہی کالعدم قرار دے رکھا ہے اور اس کی حمایت کرنے والوں کو 14 سال تک قید کی سزا ہو سکتی ہے۔ پولیس کا کہنا ہے کہ یہ کارروائی سیکیورٹی خدشات اور غیر قانونی اجتماع کے خلاف کی گئی تاہم مظاہرین نے دعویٰ کیا ہے کہ وہ پرامن اور خاموش احتجاج کر رہے تھے۔ رپورٹس کے مطابق اس سے قبل بھی گزشتہ ہفتے 29 افراد کو اسی نوعیت کے الزامات میں حراست میں لیا گیا تھا۔ احتجاج کرنے والے افراد نے برطانیہ کی اسلحہ ساز کمپنیوں کی عمارتوں کے باہر مظاہرے کیے جنہیں مظاہرین نے جنگی جرائم میں ملوث قرار دیا ہے۔ لندن کے علاوہ مانچسٹر، کارڈیف اور شمالی آئرلینڈ میں بھی فلسطینی حمایت میں احتجاجی مظاہرے کیے گئے۔ مظاہرین کا کہنا ہے کہ وہ دنیا بھر میں ہونے والے انسانی حقوق کی خلاف ورزیوں، خصوصاً غزہ میں جاری صورتحال کے خلاف آواز بلند کر رہے ہیں۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل