وزیرِاعظم شہباز شریف آج ملائیشیا کے 3 روزہ سرکاری دورے پر روانہ ہوں گے

وزیراعظم شہباز شریف ملائیشیا کے وزیراعظم انوار ابراہیم کی دعوت پر آج 3 روزہ سرکاری دورے پر ملائیشیا روانہ ہوں گے۔ دفتر خارجہ سے جاری بیان کے مطابق وزیراعظم شہباز شریف 3 روزہ سرکاری دورے میں اپنے ملائیشین ہم منصب کے ساتھ دوطرفہ مذاکرات کریں گے جن میں علاقائی و عالمی امور پر تبادلہ خیال کیا جائے گا۔ بیان میں کہا گیا کہ دونوں رہنما تجارت، اطلاعات و مواصلات، آئی ٹی اور ٹیلی کام، حلال صنعت، سرمایہ کاری، تعلیم، توانائی، انفرا اسٹرکچر، ڈیجیٹل معیشت اور عوامی روابط سمیت مختلف شعبوں میں تعاون کو مزید فروغ دینے کے امکانات پر بھی غور کریں گے۔ دفترخارجہ کے مطابق دورے کے دوران دونوں ممالک کے درمیان موجودہ اور نئے شعبوں میں تعاون سے متعلق معاہدوں اور مفاہمتی یادداشتوں (ایم او یوز) پر دستخط بھی کیے جانے کے امکانات ہیں۔ بیان میں کہا گیا کہ یہ دورہ پاکستان اور ملائیشیا کے تعلقات کو مزید مستحکم بنانے کے دونوں ممالک کے اس عزم کا اعادہ کرتا ہے کہ وہ امن، استحکام، تجارت و سرمایہ کاری اور پائیدار ترقی کے فروغ کے لیے مشترکہ طور پر کام کرتے رہیں گے۔ وزیراعظم شہباز شریف کا دورہ ملائیشیا دونوں ممالک کے درمیان موجود دوستی اور تعاون کی مضبوط بنیادوں کو مزید مستحکم اور وسیع کرے گا۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل