اے ایم آئی میٹرز کے ذریعے بجلی چوری کا خودکار نظام، بروقت اطلاع پر کارروائیاں جاری

جدید اے ایم آئی میٹرز سے خودکار طریقے سے بجلی چوری کی نشاندہی کا عمل جاری ہے۔ چیف ایگزیکٹو آئیسکو  انجینئر چوہدری خالد محمود نے کہا ہے کہ اے ایم آئی میٹرز کا  ایک اہم ترین فیچر بجلی چوری کی خود کار طریقے سے نشاندہی کرنا ہے۔ انہوں نے بتایا کہ حال میں ہی اے ایم آئی آپریشن روم نے راولپنڈی کے مختلف علاقوں ترنول گلزار قائد سہام گنگال ڈھوک کالا خان سواں روات اور اڈیالہ میں بجلی چوری اور میٹرز ٹمپرڈ کرنے کے متعدد کیسز کی بروقت اطلاع متعلقہ ایس ڈی او کے دفاتر کو دی۔ حکام نے بروقت کارروائی عمل میں لاتے ہوئے نہ صرف فوری طوری طور پر اے ایم آئی آپریشن روم سے متعلقہ صارفین کی بجلی منقطع کر دی گئی بلکہ متعلقہ ایس ڈی او ڈیٹیکشن ٹیموں نے بجلی چوروں کو جرمانے عائد کیے اور ایف آئی آر کے اندراج کے لیے متعلقہ پولیس اسٹیشن میں درخواستیں بھی دے دی ہیں۔ انجینئر چوہدری خالد محمود نے کہا کہ یقینی طور پر اس جدید ٹیکنالوجی کے حامل میٹرز سے حکومت پاکستان کی ہدایات پر بجلی چوروں کے خلاف جاری کریک ڈاؤن میں مزید تیزی آئے گی۔ انہوں نے پروجیکٹ ڈائریکٹر اے ایم آئی محسن رضا گیلانی، ان کی ٹیم اور تمام آپریشن فارمیشنز  کی کارکردگی کو سراہا اور اس عزم کا اعادہ کیا کہ آئیسکو ریجن سے بجلی چوری کے ناسور کا خاتمہ کریں گے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل