13 سالہ مارشل آرٹس اسٹار فاطمہ نسیم نے 10 عالمی ریکارڈ مکمل کر لیے

پاکستان کی 13 سالہ مارشل آرٹس اسٹار فاطمہ نسیم نے بھارتی کھلاڑی کو شکست دے کر اپنے 10 عالمی ریکارڈ مکمل کر لیے۔ فاطمہ نسیم پاکستان کے لیے 10 عالمی ریکارڈ بنانے والی پہلی خاتون کھلاڑی بھی بن گئیں۔ فاطمہ نسیم نے ہاتھوں میں انڈے پکڑ کر ایک منٹ میں 340 پنچز لگا کر بھارتی کھلاڑی  دیبیاجوتی سرکار کا 331 پنچز کا ریکارڈ توڑ دیا۔ گنیز ورلڈ ریکارڈز نے فاطمہ کا اسٹریچنگ کیٹیگری میں بھی ایک اور عالمی ریکارڈ تسلیم کرلیا، جس میں فاطمہ نسیم نے دو کرسیوں کے درمیان طویل ترین دورانیے تک اسٹریچنگ کا اعزاز حاصل کیا اور ایک منٹ 45 سیکنڈز تک بیلنس بنا کر رکھا۔ قبل ازیں کم سے کم ریکارڈ ایک منٹ 30 سیکنڈ کا تھا۔ فاطمہ اس سے پہلے چار بھارتی کھلاڑیوں کو شکست دے چکی ہیں جبکہ دنیا کی مشہور ترین لچکدار ایتھلیٹ لبرٹی باروس کا ریکارڈ بھی توڑ چکی ہیں۔ لبرٹی باروس برطانیہ، امریکا اور اسپین کے معروف شوز میں اپنی حیران کن صلاحیتوں کا مظاہرہ کر چکی ہیں۔ فاطمہ کو متعدد عالمی ریکارڈز کی حامل جرمنی کی مشہور مارشل آرٹس ایتھلیٹ پالینا گلیبووا کو شکست دینے کا اعزاز بھی حاصل ہے۔ فاطمہ بھارتی مارشل آرٹسٹ کرن یونیال کا ریکارڈ بھی توڑ چکی ہیں۔ فاطمہ مسلسل عالمی سطح کے کھلاڑیوں اور ریکارڈ ہولڈرز کو پیچھے چھوڑ کر پاکستان کا نام روشن کر رہی ہیں۔ دوسری جانب حیران کن امر یہ ہے کہ فاطمہ نسیم کو آج تک حکومتی سطح پر کوئی باقاعدہ سرپرستی حاصل نہیں ہوئی۔ فاطمہ کا خاندان بھی عالمی ریکارڈز کے حوالے سے منفرد مقام رکھتا ہے۔ ان کے والد، والدہ، دادا اور بھائی بھی گنیز ورلڈ ریکارڈ ہولڈرز ہیں اور پوری فیملی مل کر180 سے زائد عالمی ریکارڈز پاکستان کے نام کر چکی ہے۔ فاطمہ کے والد نسیم نے بھی انفرادی طور پر 165 عالمی ریکارڈز پاکستان کے نام کیے ہیں۔ یہ خاندان اپنی مدد آپ کے تحت عالمی سطح پر پاکستان کا نام روشن کرنے میں مصروف ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل