سردیوں میں بال لمبے اور گھنے کرنے کیلئے ناریل کا تیل بہتر ہے یا کیسٹر آئل؟

سردیوں کا موسم آتے ہی بالوں کی خشکی، روکھے پن اور ٹوٹنے کی شکایات بڑھنے لگتی ہیں، ایسے میں اکثر لوگ بالوں کو لمبا، گھنا اور مضبوط بنانے کیلئے مختلف تیلوں کا استعمال شروع کر دیتے ہیں۔ بالوں کی دیکھ بھال کیلئے ناریل کا تیل اور کیسٹر آئل خاصے مقبول ہیں، لیکن کیا آپ جانتے ہیں کہ ان دونوں میں سے کون سا تیل زیادہ فائدہ مند ہے؟ ماہرین کے مطابق دونوں تیل بالوں کیلئے مفید ہو سکتے ہیں، تاہم ان کے فوائد مختلف ہیں۔ ناریل کا تیل بالوں کیلئے کیوں بہتر ہے؟ ناریل کے تیل میں لورک ایسڈ پایا جاتا ہے، جو بالوں کے اندر تک پہنچ کر پروٹین کے ضیاع کو کم کرنے میں مدد دیتا ہے۔ سردیوں میں بال خشک ہونے کے باعث آسانی سے ٹوٹ سکتے ہیں، ایسے میں ناریل کا تیل انہیں نقصان سے بچانے اور مضبوط رکھنے میں مددگار ثابت ہو سکتا ہے۔ اس کا باقاعدہ استعمال بالوں کو نرم اور صحت مند رکھنے میں مدد دے سکتا ہے، تاہم یہ نئے بال اگانے کی ضمانت نہیں۔ کیسٹر آئل کے کیا فوائد ہیں؟ کیسٹر آئل نسبتاً گاڑھا ہوتا ہے اور اس میں رائسنولک ایسڈ موجود ہوتا ہے۔ یہ بالوں پر حفاظتی تہہ بنا کر نمی برقرار رکھنے، خشکی کم کرنے اور انہیں چمک دار بنانے میں مدد دے سکتا ہے۔ مگر یہ عام تاثر درست نہیں کہ کیسٹر آئل لگانے سے بال تیزی سے لمبے یا زیادہ گھنے ہو جاتے ہیں۔ سردیوں میں کون سا تیل استعمال کرنا چاہیے؟ اگر آپ کے بال خشک، کمزور اور آسانی سے ٹوٹتے ہیں تو ناریل کا تیل نسبتاً بہتر انتخاب ہو سکتا ہے، کیونکہ بالوں میں پروٹین کے ضیاع کو کم کرنے کے حوالے سے اس کے حق میں زیادہ سائنسی شواہد موجود ہیں۔ دوسری جانب اگر مقصد صرف بالوں کو نرم اور چمک دار بنانا ہے تو کیسٹر آئل بھی استعمال کیا جا سکتا ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل