آبنائے ہرمز میں سمندر پر تیرتے آئی فونز اور مہنگے پرفیومز کی ویڈیو وائرل

آبنائے ہرمز میں ایک مال بردار جہاز ڈوبنے کے بعد سمندر پر تیرتے آئی فونز اور مہنگے پرفیومز کی ویڈیو سوشل میڈیا پر وائرل ہوگئی۔ ویڈیو میں سمندر کی سطح پر پرفیوم کی بوتلوں کے پیکٹ اور آئی فونز کے ڈبے بکھرے دکھائی دیتے ہیں، جبکہ چھوٹی کشتیوں میں سوار افراد پانی سے یہ سامان نکالتے نظر آتے ہیں۔ ابتدائی اطلاعات میں بتایا گیا ہے کہ دبئی سے سامان لے کر روانہ ہونے والا سنگاپور کا پرچم بردار کنٹینر جہاز ’جی ایف ایس پرائیڈ‘ بدھ کے روز ایک حملے کے بعد آگ لگنے سے ڈوب گیا۔ تاہم، وائرل ویڈیو کی آزادانہ طور پر تصدیق نہیں ہوسکی۔ اطلاعات کے مطابق جہاز میں لگ بھگ ڈھائی ہزار کنٹینرز موجود تھے، جن میں قیمتی پرفیومز اور آئی فونز بھی شامل تھے۔ iPhones and other goods float on the sea surface after a container ship sank in the Strait of Hormuz due to hitting a naval mine. pic.twitter.com/L0FYq55h0r — Middle East Observer (@ME_Observer_) October 14, 2026 ایران کی پاسدارانِ انقلاب نے دعویٰ کیا کہ جہاز آبنائے ہرمز میں بحری بارودی سرنگ سے ٹکرانے کے بعد ڈوبا، کیونکہ وہ ان کے بقول غیر مجاز راستے سے گزر رہا تھا۔ دوسری جانب سمندری حکام کا کہنا ہے کہ جہاز کو ایک نامعلوم نوعیت کے پروجیکٹائل سے نشانہ بنایا گیا تھا۔ یوں جہاز ڈوبنے کی اصل وجہ سے متعلق مختلف دعوے سامنے آئے ہیں۔ سنگاپور کی میری ٹائم اینڈ پورٹ اتھارٹی کے مطابق جہاز کے عملے کے تمام 21 ارکان کو بحفاظت نکال لیا گیا اور کسی کے زخمی ہونے کی اطلاع نہیں ملی۔ ادھر سمندر میں تیرتے سامان کو چھوٹی کشتیوں کے ذریعے جمع کرنے کے مناظر بھی رپورٹ ہوئے ہیں۔ یہ واقعہ آبنائے ہرمز میں تجارتی جہازوں پر بڑھتے حملوں کے دوران پیش آیا ہے۔ گزشتہ دس روز میں اس اہم سمندری گزرگاہ کے آس پاس متعدد واقعات رپورٹ ہوئے، جن میں ڈرون حملے بھی شامل ہیں۔ برطانوی میری ٹائم ٹریڈ آپریشنز ادارے کے مطابق 48 گھنٹوں کے دوران ٹینکروں اور دیگر تجارتی جہازوں کو نشانہ بنانے کے کم از کم پانچ واقعات سامنے آئے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل