اسرائیلی فوج نے مغربی کنارے میں فلسطینی گھروں کو فوجی چوکیوں میں تبدیل کر دیا

اسرائیلی فوج نے مغربی کنارے کے علاقے الخلیل میں فلسطینی گھروں پر قبضہ کرکے انہیں فوجی چوکیوں میں تبدیل کردیا. مقبوضہ مغربی کنارے کے شہر الخلیل میں اسرائیلی فوج کی کارروائیوں میں شدت آگئی ہے۔ فلسطینی سرکاری خبر رساں ایجنسی وفا کے مطابق اسرائیلی فورسز نے متعدد فلسطینی خاندانوں کو ان کے گھروں سے زبردستی نکال کر ان مکانات کو فوجی بیرکوں اور نگرانی کی چوکیوں میں تبدیل کردیا۔  رپورٹ کے مطابق خلة مناع اور ضاحیہ الزیتون کے علاقوں میں فوجیوں نے گھروں کو خالی کرایا۔ بعض مکانات میں فوجی اہلکار تعینات کیے گئے جبکہ ایسے گھروں کو بھی نگرانی کے لیے استعمال کیا گیا جو آس پاس کے علاقوں پر نظر رکھنے کے لیے موزوں مقامات پر واقع ہیں۔  یہ کارروائی الخلیل میں اسرائیلی فوج کی ایک وسیع فوجی کارروائی کے دوران ہو رہی ہے۔ کارروائی کا آغاز جمعے کو ایک چیک پوسٹ پر فائرنگ کے واقعے کے بعد ہوا، جس میں اسرائیلی حکام کے مطابق دو اسرائیلی فوجی ہلاک اور تین زخمی ہوئے۔ اسرائیلی فوج کا کہنا ہے کہ آپریشن کا مقصد مشتبہ مسلح افراد، ہتھیاروں اور مبینہ عسکری ڈھانچے کی تلاشی ہے۔  دوسری جانب فلسطینی حکام اور مقامی باشندوں کا کہنا ہے کہ کارروائی کے نتیجے میں سینکڑوں خاندان بے گھر ہوئے ہیں۔ رائٹرز کے مطابق تقریباً 1,200 فلسطینی پہلے ہی اپنے گھروں سے بے دخل ہوچکے ہیں جبکہ مزید تقریباً 1,300 افراد کے بے گھر ہونے کا خدشہ ظاہر کیا گیا ہے۔  فلسطینی حکام نے اسرائیلی اقدامات کو اجتماعی سزا اور جبری بے دخلی قرار دیتے ہوئے عالمی برادری سے فوری مداخلت کا مطالبہ کیا ہے۔ اسرائیلی حکومت تاہم کارروائی کو سکیورٹی آپریشن قرار دے رہی ہے اور کہتی ہے کہ اس کا مقصد حملوں کے ذمہ دار مسلح عناصر اور ان کے ڈھانچے کے خلاف کارروائی کرنا ہے۔ 

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل