کراچی انٹرمیڈیٹ سال اول سائنس، کامرس اور آرٹس ریگولر و پرائیویٹ کے نتائج کا اعلان

اعلیٰ ثانوی تعلیمی بورڈ کراچی نے انٹرمیڈیٹ حصہ اول سائنس پری میڈیکل، سائنس جنرل، کامرس ریگولر و پرائیویٹ، آرٹس ریگولر و پرائیویٹ، خصوصی امیدواروں (آرٹس ریگولر) اور ہومِ اکنامکس کے گروپس کے سالانہ امتحانات برائے 2026ء کے نتائج کا اعلان کردیا۔ واضح رہے کہ سائنس گروپس کے تمام اختیاری مضامین کے امتحانات کے نتائج کی ای اسسمنٹ (E-Assessment) جدید ترین او ایم آر (OMR) اور ای مارکنگ (E-Marking) سسٹم کے تحت کی گئی ہے۔ ناظم امتحانات زرینہ راشد نے نتائج کی تفصیلات بتاتے ہوئے کہا کہ سائنس میڈیکل گروپ کے امتحانات میں 25157 امیدواروں نے رجسٹریشن حاصل کی، 24544 امیدوار امتحانات میں شریک ہوئے ان میں سے 11966امیدوار تمام چھ پرچوں میں کامیاب ہوئے۔ سائنس جنرل گروپ کے امتحانات میں 30991 امیدواروں نے رجسٹریشن حاصل کی، 30386 امیدوار امتحانات میں شریک ہوئے جس میں سے 15036 امیدوار تمام چھ پرچوں میں کامیاب ہوئے۔ ناظم امتحانات نے کامرس(ریگولر) گروپ کے نتائج کا اعلان کرتے ہوئے بتایا کہ ان امتحانات میں 23549امیدواروں نے رجسٹریشن حاصل کی، 22693 امیدوار امتحانات میں شریک ہوئے جس میں سے 9332امیدوار تمام سات پرچوں میں کامیاب ہوئے۔ اسی طرح کامرس پرائیویٹ گروپ  کے امتحانات میں 1485امیدواروں نے رجسٹریشن حاصل کی،1413 امیدوار امتحانات میں شریک ہوئے جس میں سے 628امیدوار تمام سات پرچوں میں کامیاب ہوئے۔ آرٹسِ ریگولرگروپ کے امتحانات میں 11171امیدواروں نے رجسٹریشن حاصل کی، 10678 امیدوار امتحانات میں شریک ہوئے جس میں سے 3748امیدوار تمام چھ پرچوں میں کامیاب ہوئے جب کہ آرٹس پرائیویٹ گروپ کے امتحانات میں 1702امیدواروں نے رجسٹریشن حاصل کی، 1623 امیدوار امتحانات میں شریک ہوئے جس میں سے 692امیدوار تمام چھ پرچوں میں کامیاب ہوئے۔ خصوصیِ اُمیدواروں (آرٹس ریگولر) کے امتحانات میں 99امیدواروں نے رجسٹریشن حاصل کی، 97 امیدوار امتحانات میں شریک ہوئے جس میں سے 58امیدوار تمام چھ پرچوں میں کامیاب ہوئے۔ علاوہ ازیں ہومِ اکنامکس گروپ کے امتحانات میں 146امیدواروں نے رجسٹریشن حاصل کی، 141 امیدوار امتحانات میں شریک ہوئے جس میں سے 41امیدوار تمام سات پرچوں میں کامیاب ہوئے۔ یاد رہے کہ آئی بی سی سی اور محکمہ جامعات و بورڈ حکومت سندھ کے فیصلے کے مطابق رواں سال انٹرمیڈیٹ حصہ اول کے سالانہ امتحانات میں نیا گریڈنگ سسٹم نافذ کیا گیا ہے۔ نئے گریڈنگ سسٹم کے تحت کسی بھی پرچے میں 40فیصد سے کم نمبر حاصل کرنے والے امیدوار کو ان گریڈڈ  (Ungraded) قراردیا جائے گا اور اسے متعلقہ پرچے میں کامیاب تصور نہیں کیا جائے گا۔ یہ بھی پڑھیں : کراچی انٹرمیڈیٹ سائنس پری انجینئرنگ اول کے نتائج کا اعلان ایسے امیدوار اگر امتحان میں شرکت کے لیے دیگر شرائط پوری کرتے ہوں تو انہیں متعلقہ پرچے کا امتحان دوبارہ دینا ہوگا۔ سالانہ امتحانات برائے 2026ء حصہ اول کے درج بالا تمام گروپس کے نتائج بورڈ کی ویب سائٹ پر اپ لوڈ کردیئے گئے ہیں۔ امیدوا ر اپنے نتائج اعلیٰ ثانوی تعلیمی بورڈ کراچی کی آفیشل اینڈرائڈ ایپ پر بھی دیکھ سکتے ہیں۔ اینڈرائڈ ایپ کو گوگل پلے اسٹور پر  BIEK  کے نام سے سرچ کر کے موبائل میں انسٹال کیا جاسکتا ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل