Loading
بالی ووڈ اداکار رنویر سنگھ اور فلم ساز آدتیہ دھر کی ایک بار پھر مشترکہ فلم میں کام کرنے کی خبریں سامنے آئی ہیں۔ ’دھریندر‘ فرنچائز کی کامیابی کے بعد دونوں کی ممکنہ نئی شراکت داری نے فلمی حلقوں اور مداحوں میں تجسس پیدا کردیا ہے۔ اطلاعات کے مطابق یہ منصوبہ 2028 میں سینما گھروں کی زینت بن سکتا ہے۔
رپورٹس کے مطابق آدتیہ دھر گزشتہ چند ماہ سے بڑے بجٹ کی ایک فلم پر کام کررہے ہیں اور مرکزی کردار کے لیے رنویر سنگھ ان کی پہلی ترجیح ہیں۔ فلم کی شوٹنگ 2027 میں شروع ہونے کا امکان ظاہر کیا جارہا ہے، تاہم حتمی شیڈول اور دیگر تفصیلات ابھی طے نہیں ہوئیں۔
ابھی تک نہ تو رنویر سنگھ اور نہ ہی آدتیہ دھر نے اس ممکنہ اشتراک کی باضابطہ تصدیق کی ہے۔ فلم کا نام، کہانی، صنف اور دیگر اداکاروں کے بارے میں بھی کوئی حتمی اعلان سامنے نہیں آیا۔
اس خبر کے بعد یہ قیاس آرائیاں بھی شروع ہوگئی ہیں کہ دونوں کی اگلی فلم قدیم ہندوستانی تاریخ کی اہم شخصیت چندرگپت موریہ پر مبنی ایک تاریخی داستان ہوسکتی ہے۔ چندرگپت موریہ موریہ سلطنت کے بانی تھے۔ مبینہ طور پر اس فلم میں قدیم ہندوستانی سلطنت کے قیام، چندرگپت کے عروج اور ان کے مشیر و حکمت عملی کے ماہر چانکیہ کے کردار کو نمایاں کیا جاسکتا ہے۔
بعض رپورٹس میں دعویٰ کیا گیا ہے کہ رنویر سنگھ چانکیہ کا کردار ادا کرسکتے ہیں، جبکہ کنڑ فلموں کے معروف اداکار یش کو چندرگپت موریہ کے کردار کے لیے زیر غور بتایا جارہا ہے۔ تاہم ان خبروں کی بھی تصدیق نہیں ہوئی اور فی الحال ایسا کوئی باضابطہ اعلان موجود نہیں جو آدتیہ دھر کے ساتھ رنویر کی ممکنہ نئی فلم کو اسی تاریخی منصوبے سے جوڑتا ہو۔
دونوں کی دوبارہ شراکت داری کی خبروں کو ’دھریندر‘ اور اس کے سیکوئل ’دھریندر: دی ریوینج‘ کی کامیابی نے مزید اہم بنادیا ہے۔ رپورٹس کے مطابق دونوں فلموں نے دنیا بھر میں مجموعی طور پر 30 ارب بھارتی روپے سے زیادہ کا بزنس کیا۔ رنویر کی اداکاری اور آدتیہ دھر کی ہدایت کاری کو ان فلموں کی مقبولیت کی اہم وجوہات میں شمار کیا گیا۔
دوسری جانب رنویر سنگھ اپنی ایک اور فلم ’پرلے‘ کی تیاریوں میں مصروف ہیں، جس کی ہدایت کاری جے مہتا کررہے ہیں۔ یہ ایک پوسٹ اپوکیلیپٹک تھرلر فلم ہوگی، جس میں ممبئی کو درپیش بحران کے پس منظر میں بقا کی جدوجہد دکھائی جائے گی۔
ابھی یہ طے نہیں کہ آدتیہ دھر اپنی اگلی فلم کے لیے چندرگپت موریہ کی تاریخی کہانی کا انتخاب کرتے ہیں یا کسی دوسرے موضوع پر کام کرتے ہیں۔ فی الحال دونوں کی دوبارہ جوڑی بننے کی اطلاعات نے مداحوں کی دلچسپی بڑھا دی ہے، تاہم باضابطہ اعلان کا انتظار ہے۔
اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔
مزید تفصیل