ملک بھر میں دہشت گردی کے 2273 مقدمات زیر التواء، سندھ 1372 مقدمات کے ساتھ سرفہرست

چیف جسٹس پاکستان یحییٰ آفریدی کی زیر صدارت انسداد دہشت گردی عدالتوں کے انتظامی ججز کا اہم اجلاس ہوا جس میں انکشاف ہوا کہ اس وقت ملک بھر میں انسداد دہشت گردی کے 2273 مقدمات زیر التواء ہیں صرف صوبہ سندھ میں 1372 انسداد دہشت گردی مقدمات فیصلوں کے منتظر ہیں۔ ایکسپریس نیوز کے مطابق انسداد دہشت گردی عدالتوں کے انتظامی ججز کے اجلاس کا اعلامیہ جاری کردیا گیا جس کے مطابق چیف جسٹس یحییٰ آفریدی کی زیر صدارت اجلاس ہوا جس میں پانچوں ہائی کورٹس کے انتظامی ججز نے شرکت کی۔ اجلاس میں انسداد دہشت گردی مقدمات کی صورتحال اور درپیش چیلنجز کا تفصیلی جائزہ لیا گیا۔ اجلاس میں انسداد دہشت گردی مقدمات میں انصاف کی جلد فراہمی کیلئے تجاویز پر غورہوا، اجلاس میں سپریم کورٹ کے چار مانیٹرنگ ججز، صوبائی پراسیکیوٹر جنرلز نے بھی شرکت کی۔ مانیٹرنگ ججز میں جسٹس جمال مندوخیل، جسٹس محمد علی مظہر، جسٹس مسرت ہلالی اور جسٹس شہزاد احمد خان شامل تھے۔ اجلاس میں انکشاف ہوا کہ اس وقت ملک بھر میں انسداد دہشت گردی کے 2273 مقدمات زیر التواء ہیں صرف صوبہ سندھ میں 1372 انسداد دہشت گردی مقدمات فیصلوں کے منتظر ہیں۔ چیف جسٹس نے انسداد دہشت گردی مقدمات میں تاخیر، غیر ضروری التواء پر تشویش کا اظہار کیا، گواہوں کے تحفظ اور آن لائن پیشی، مزید انسداد دہشت گردی عدالتوں کے قیام پر غور کیا گیا۔ چیف جسٹس نے فرانزک سائنس لیبارٹری سندھ کو بلوچستان میں لیبارٹری کے قیام میں مدد دینے کی ہدایت کی۔ چیف جسٹس کی انسداد دہشت گردی عدالتوں میں مدت پوری کرنے والے ججز کو نرم پوسٹوں پر تعینات کرنے کی ہدایت کی گئی۔ چیف جسٹس پاکستان نے اچھی کارکردگی دکھانے والے اے ٹی سی ججز کو بیرون ملک تربیتی مواقع فراہم کرنے کا حکم بھی دیا۔ انسداد دہشت گردی عدالتوں کے مسائل حل اور ضروریات پوری کرنے کی ہدایات جاری کی ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل