الیکٹرانک فراڈ، جعلسازی اور بینک صارفین سے دھوکا دہی میں ملوث منظم گروہ کا سرغنہ گرفتار

ایف آئی اے سائبر کرائم سرکل اسلام آباد نے بڑی کارروائی کرتے ہوئے الیکٹرانک فراڈ، جعلسازی اور برانچ لیس بینکنگ ریٹیلرز سے دھوکہ دہی میں ملوث منظم گروہ کا سرغنہ گرفتار کرلیا۔ ترجمان ایف آئی اے کی جانب سے جاری کردہ بیان کے مطابق گرفتار ملزم کی شناخت محمد طارق کے نام سے ہوئی، ملزم کے خلاف پیکا 2016 کے تحت متعدد مقدمات درج ہیں، ملزم دیگر ساتھیوں کی معاونت سے برانچ لیس بینکنگ ریٹیلرز کے ساتھ فراڈ اور دھوکہ دہی میں ملوث پایا گیا۔ بیان کے مطابق ملزم برانچ لیس ریٹیلرز کی دکانوں پر جا کر ان کا موبائل فون حاصل کرتا جس میں ریٹیلر سم (CBA اکاؤنٹ) موجود ہوتی تھی، ملزم مختلف حیلے بہانوں سے دکاندار کو مصروف کر کے اصل سم کو بلاک شدہ سم سے تبدیل کر دیتا تھا۔ ایف آئی اے نے بتایا کہ ملزم CBA اکاؤنٹ سے موجودہ رقم دیگر ریٹیلر اکاؤنٹس میں منتقل کروا کر کیش حاصل کر لیتا تھا، ملزم نے شہری کے اکاؤنٹ سے 1 لاکھ 77 ہزار روپے سے زائد کی رقم منتقل کی۔ اس میں کہا گیا کہ چھاپہ مار کارروائی کے دوران ملزم سے موبائل فون اور دیگر شواہد حاصل کر لیے گئے، ملزم کو گرفتار کر کے تفتیش کا آغاز کر دیا گیا ہے، ملزم کے دیگر ساتھیوں کی گرفتاری کیلئے چھاپے مار کاروائیاں جاری ہیں۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل