کراچی: سفاک شوہر نے بھائی کے ساتھ ملکر بیوی کو تیزاب پلا کر قتل کردیا

کراچی کے علاقے کورنگی میں سفاک شوہرنے بھائی کے ساتھ ملکر بیوی کو تیزاب پلاکرقتل کردیا، مقتولہ خاتون 2 بیٹیوں کی ماں تھی، پولیس نے واقعے کا مقدمہ شوہر اور اس کے بھائی کے خلاف درج کرکے تفتیش شروع کردی۔ رپورٹ کے مطابق کورنگی صنعتی ایریا تھانے کے علاقے کورنگی صنعتی ایریا سیکٹر8 بی آللہ آباد کالونی میں سفاک شوہر نے بھائی کے ساتھ ملکر مبینہ طور پر بیوی کو تیزاب پلا دیا۔ نورعائشہ نامی خاتون کوتشویشناک حالت میں جناح اسپتال منتقل کیا گیا جہاں خاتون دوران علاج دم توڑگئی۔ پولیس کے مطابق واقعہ 4 جولائی کی صبح پیش آیا تھا، پولیس نے مقتولہ خاتون کے والد علی اکبرکی مدعیت میں واقعے کا مقدمہ قتل کی دفعہ کے تحت درج کرلیا۔ مقدمے میں مقتولہ خاتون کے شوہرمحمد ایوب اوراس کے بھائی رفیق کو نامزد کیا گیا، مدعی مقدمہ کے مطابق ان کی بیٹی نورفاطمہ کی 7 سال قبل محمد ایوب سے شادی ہوئی تھی اورجس سے اس کی دوبیٹیاں ہیں۔ انھوں نے بتایا کہ ان کا داماد شروع سے غیرعورتوں کا تعلق قائم رکھتا تھا جس کی وجہ سے ان کی بیٹی اکثر ناراض ہوکر میکے آجایا کرتی تھی اور داماد بیٹی کوراضی کرکے لے جاتا تھا۔ جب ہم اپنے داماد کو سمجھانے کی کوشش کرتے تھے تو داماد کا بھائی رفیق ہم سے لڑائی جھگڑا کرنے لگتا تھا اور کہتا تھا کہ میرے بھائی کو غیرعورتوں کے ساتھ تعلق رکھنے سے کوئی منع نہیں کرسکتا جس کے بعد ہم مجبور ہو کر اپنی بیٹی کو گھر بسانے کا مشورہ دیتے رہتے تھے۔ 4 جولائی کی صبح 6 بجے اطلاع ملی کہ میری بیٹی نورعائشہ کو میرے داماد اور اس کے بھائی رفیق نے ملکر تیزاب پلا دیا اورمارپیٹ کی ہے، بیٹی جناح اسپتال میں زیرعلاج ہے۔ اس کے بعد میں فوراً جناح اسپتال پہنچا تو میری بیٹی دوران علاج دم توڑگئی، ڈاکٹرزنے تیزاب پینے سے انفیکشن کی وجہ سے بیٹی کے جاں بحق ہونے کی تصدیق کردی۔ اب میرا دعویٰ میرے داماد محمد ایوب اور اس کے بھائی رفیق کے خلاف میری بیٹی نورعائشہ کوزبردستی تیزاب پلانے کی وجہ سے ہلاک کرنا ہے، لہذا قانونی کارروائی کی جائے۔ دوسری جانب پولیس حکام کا کہنا ہے کہ ابتدائی تفتیش میں خاتون کو تیزاب پلانے کے شواہد ملے ہیں جس کی مزید تصدیق کی جا رہی ہے۔ انھوں نے بتایا کہ پولیس کو معلوم ہوا کہ مقدمے میں نامزد ملزمان نے عدالت سے ضمانت قبل ازوقت گرفتاری حاصل کرلی ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل