انجلینا جولی کے بڑے بیٹے نے قانونی طور پر والد بریڈ پٹ کا نام ہٹا دیا

ہالی ووڈ کے مشہور جوڑے بریڈ پٹ اور انجلینا جولی کے بڑے بیٹے میڈوکس نے قانونی طور پر اپنے نام سے ’’پٹ‘‘ ہٹا دیا ہے اور اب وہ سرکاری طور پر صرف ’’میڈوکس جولی‘‘ کے نام سے جانے جائیں گے۔ رپورٹس کے مطابق میڈوکس نے مئی 2026 میں نام کی تبدیلی کے لیے باضابطہ قانونی دستاویزات جمع کرائی تھیں۔ اگرچہ یہ اقدام اب قانونی طور پر مکمل ہو چکا ہے، تاہم وہ اس سے پہلے ہی اپنے مختلف پیشہ ورانہ پروجیکٹس میں ’’جولی‘‘ کا نام استعمال کر رہے تھے۔ تفصیلات کے مطابق 2024 کی فلم ’ماریہ‘ میں انہیں ’’میڈوکس جولی پٹ‘‘ کے طور پر کریڈٹ دیا گیا تھا، جبکہ 2025 کی فلم Couture میں، جہاں وہ بطور تھرڈ اسسٹنٹ ڈائریکٹر کام کر رہے تھے، ان کا نام صرف ’’میڈوکس جولی‘‘ درج کیا گیا۔ یہ پہلا موقع نہیں کہ اس جوڑے کے بچوں نے والد کے نام سے فاصلہ اختیار کیا ہو۔ اس سے قبل بھی ان کے دیگر بہن بھائیوں نے اپنے نام سے ’’پٹ‘‘ ہٹانے یا اسے استعمال نہ کرنے کا رجحان اپنایا تھا، اور اب میڈوکس بھی اسی سلسلے کا حصہ بن گئے ہیں۔ رپورٹس کے مطابق بریڈ پٹ اور انجلینا جولی کے چھ بچوں میں سے کم از کم چار نے عوامی سطح پر اپنے نام میں ’’پٹ‘‘ استعمال نہ کرنے یا اسے ختم کرنے کا فیصلہ کیا ہے۔ یاد رہے کہ بریڈ پٹ اور انجلینا جولی کی ملاقات 2003 میں فلم ’مسٹر اینڈ مسز اسمتھ‘ کے سیٹ پر ہوئی تھی، جس کے بعد دونوں نے 2014 میں شادی کی تھی، تاہم 2016 میں جولی نے طلاق کے لیے درخواست دائر کر دی تھی۔ طلاق اور بچوں کی تحویل کے معاملات کے دوران انجلینا جولی نے خاندان میں کشیدگی اور بعض مبینہ ناخوشگوار واقعات کے الزامات بھی عائد کیے تھے، جن کی بریڈ پٹ نے تردید کی۔ بعد ازاں پٹ نے یہ بھی تسلیم کیا تھا کہ انہوں نے شراب نوشی چھوڑنے کے لیے بحالی پروگرام میں حصہ لیا تھا۔ نام کی یہ تبدیلیاں اس بات کی عکاسی کرتی ہیں کہ جولی اور پٹ کے کچھ بچے اپنی شناخت کو زیادہ تر والدہ کے خاندانی نام سے جوڑنے کو ترجیح دے رہے ہیں، تاہم خاندان کی جانب سے ان فیصلوں کی تمام تفصیلات عوامی طور پر واضح نہیں کی گئیں۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل