انفینٹینو کی مشکل میں اضافہ، اٹلی اور رومانیہ کی فٹبال فیڈریشنز حمایت سے دستبردار

اٹلی اور رومانیہ کی فٹبال فیڈریشنز نے فیفا کے صدر جانی انفینٹینو کی آئندہ مدت کے لیے دوبارہ انتخاب کی حمایت سے دستبرداری اختیار کرلی جس کے بعد انفینٹینو پر مستعفی ہونے کے لیے دباؤ مزید بڑھ گیا۔ اطالوی فٹبال فیڈریشن (FIGC) نے کہا کہ مارچ میں ہونے والے فیفا صدارتی انتخاب میں انفینٹینو کی حمایت نہیں کریں گے۔ فیڈریشن کے مطابق یہ فیصلہ فیفا صدر کی جانب سے حالیہ دنوں میں گورننس اور بین الاقوامی مقابلوں کی ترقی سے متعلق کیے گئے اقدامات کے باعث کیا گیا۔ فیڈریشن کے صدر جیوانی مالاغو نے کہا کہ اٹلی یورپی فٹبال کی تنظیم یوئیفا اور دیگر یورپی فیڈریشنز کے ساتھ مل کر ایسے فٹبال کے فروغ کے لیے کام جاری رکھے گا جس کی بنیاد میرٹ، یکجہتی، پائیداری اور شائقین کی اہمیت پر ہو۔ دوسری جانب رومانیہ کی فٹبال فیڈریشن کی ایگزیکٹو کمیٹی نے بھی اجلاس میں انفینٹینو کو نئی مدت کے لیے ووٹ نہ دینے کا فیصلہ کیا۔ رومانیہ کے فٹبال فیڈریشن کے صدر رزوان برلیانو نے کہا کہ اب ایسے نئے رہنما کی ضرورت ہے جو اتفاقِ رائے اور اتحاد پیدا کرسکے، اعتماد بحال کرے اور سب کو متحد کرنے کی صلاحیت رکھتا ہو۔ انفینٹینو کو اس وقت شدید دباؤ کا سامنا ہے۔ ان کے اس منصوبے پر خاص طور پر تنقید ہوئی تھی جس کے تحت ورلڈ کپ میں نجی سرمایہ کاروں کو حصص فروخت کرنے کی تجویز سامنے آئی تھی، تاہم یہ منصوبہ اب ختم کردیا گیا۔  

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل