مائیکل جیکسن کی مشہور ’تھرلر‘ جیکٹ کی نیلامی، قیمت کیا ہوگی؟

پاپ موسیقی کے بے تاج بادشاہ مائیکل جیکسن کی مشہور سرخ اور سیاہ ’تھرلر‘ جیکٹ ایک مرتبہ پھر نیلامی کے لیے پیش کی جا رہی ہے۔ اس بار یہ نیلامی دسمبر میں ابوظبی میں ہوگی، جہاں گلوکار کے ملبوسات اور دیگر یادگار اشیا کے 100 سے زائد نمونے خریداروں کے سامنے رکھے جائیں گے۔ ان میں جیکٹ کے علاوہ ان کا مشہور چمک دار دستانہ اور 1983 میں استعمال ہونے والے جوتوں کے دو جوڑے بھی شامل ہیں۔ جولینز آکشنز کے زیرِاہتمام ’مائیکل جیکسن: دی فیشن لیگیسی ایوننگ آکشن‘ 7 سے 9 دسمبر 2026 تک روزوُڈ ابوظبی میں منعقد ہوگی۔ اس نیلامی کو کمپنی کے ’سیلیبریٹی اینڈ پاپ کلچر ایکسپیرینس‘ کا حصہ بنایا گیا ہے۔ تھرلر جیکٹ کی منفرد تاریخ ’تھرلر‘ میوزک ویڈیو کے لیے ایسی صرف دو جیکٹیں تیار کی گئی تھیں۔ ان کا ڈیزائن ملبوسات کی معروف ڈیزائنر ڈیبورا نڈولمین لینڈس نے تیار کیا تھا، جو ویڈیو کے ہدایت کار جان لینڈس کی اہلیہ ہیں۔ ان میں سے ایک جیکٹ زومبی رقص کے دوران استعمال ہونے سے گھس گئی تھی اور جیکسن خاندان کے پاس محفوظ رہی، جبکہ دوسری ابوظبی میں نیلامی کے لیے پیش کی جا رہی ہے۔ اس جیکٹ کی آستین پر مائیکل جیکسن کے دستخط موجود ہیں۔ گلوکار نے یہ جیکٹ اپنے دیرینہ ملبوسات کے ڈیزائنرز ڈینس ٹامپکنز اور مائیکل بش کو دی تھی۔ جون 2011 میں انہوں نے اسے بیورلی ہلز میں جولینز آکشنز کے ذریعے فروخت کیا، جہاں ٹیکساس سے تعلق رکھنے والے اجناس کے تاجر ملٹن ویرٹ نے تقریباً ایک درجن بین الاقوامی بولی دہندگان کو پیچھے چھوڑتے ہوئے اسے 18 لاکھ ڈالر میں خریدا تھا۔ گنیز ورلڈ ریکارڈز کے مطابق اس وقت یہ نیلامی میں فروخت ہونے والی سب سے مہنگی جیکٹ بن گئی تھی۔ ویرٹ نے جیکٹ کو مختلف مقامات پر نمائش کے لیے لے جانے اور بچوں کے اسپتالوں کے لیے رقم جمع کرنے کا منصوبہ بنایا تھا۔ 2011 کی فروخت سے حاصل ہونے والی رقم کا کچھ حصہ شمبالا پریزرو کو بھی دیا گیا، جو بڑی بلیوں کے تحفظ کا مرکز ہے اور جہاں مائیکل جیکسن کے بنگال ٹائیگرز کو رکھا گیا تھا۔ دلچسپ بات یہ ہے کہ ان میں سے ایک شیر کا نام بھی ’تھرلر‘ تھا۔ اب تقریباً 15 سال بعد یہ جیکٹ دوبارہ نیلامی کے لیے پیش کی جا رہی ہے۔ جولینز آکشنز کے شریک بانی مارٹن نولان نے، پیپل میگزین کے حوالے سے جاری بیان میں کہا کہ دنیا نے اس جیکٹ کے بارے میں بات کرنا کبھی بند نہیں کی۔ مشہور دستانہ اور جوتے بھی نیلامی کا حصہ نیلامی میں مائیکل جیکسن کا وہ چمک دار دستانہ بھی شامل ہوگا جو انہوں نے گیت ’بلی جین‘ کی پرفارمنس کے دوران ’موٹاؤن 25: یسٹرڈے، ٹوڈے، فارایور‘ میں پہنا تھا۔ مئی 1983 میں ٹیلی وژن پر نشر ہونے والے اس شو میں جیکسن نے پہلی بار بڑے پیمانے پر اپنا مشہور ’مون واک‘ رقص پیش کیا تھا، جو بعد میں ان کی پہچان بن گیا۔ یہ دستانہ 2009 میں جولینز کے ذریعے 4 لاکھ 30 ہزار ڈالر میں فروخت ہوا تھا اور اس وقت اس نے بھی ریکارڈ قائم کیا تھا۔ اس مرتبہ نیلام گھر کو اس کی قیمت 6 لاکھ سے 8 لاکھ ڈالر کے درمیان ملنے کی توقع ہے۔ نیلامی کی نمایاں اشیا میں سیاہ لوفر جوتوں کے دو جوڑے بھی شامل ہیں۔ ایک جوڑا وہ ہے جو جیکسن نے ’موٹاؤن 25‘ کی پرفارمنس میں پہنا تھا، جب کہ دوسرا جوڑا ’تھرلر‘ میوزک ویڈیو میں استعمال کیا گیا تھا۔ یہ جوتے فلورشائم برانڈ کے ہیں اور ان کے ساتھ ویڈیو کے کوریوگرافر مائیکل پیٹرز کے نام گلوکار کا دستخط شدہ خط بھی موجود ہے۔ یہ نیلامی 7 سے 9 دسمبر 2026 تک ابوظبی کے جزیرے الماریہ پر واقع روزوُڈ ہوٹل میں ہوگی۔ اس میں مائیکل جیکسن کے 100 سے زائد ملبوسات اور یادگار اشیا شامل ہوں گی، جبکہ ’تھرلر‘ جیکٹ، ’موٹاؤن 25‘ کا دستانہ اور 1983 کے جوتوں کے دو جوڑے خصوصی توجہ کا مرکز ہوں گے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل