نصرت بھروچا کامیاب سرجری کے بعد گھر منتقل ہوگئیں

بالی وڈ اداکارہ اور ماڈل نصرت بھروچا کو ممبئی کے اسپتال سے ڈسچارج کردیا گیا ہے، جہاں ان کی ریڑھ کی ہڈی کے فریکچر کے علاج کے لیے کامیاب سرجری کی گئی۔ اداکارہ کی ٹیم کے مطابق، وہ اب گھر پر ہیں اور صحت یابی کے مرحلے سے گزر رہی ہیں، تاہم مکمل صحت مند ہونے کے لیے انہیں وقت اور بھرپور آرام کی ضرورت ہوگی۔ فلم ’پیار کا پنچ نامہ‘ سے شہرت حاصل کرنے والی نصرت حال ہی میں کام اور تفریح کے سلسلے میں انڈونیشیا کے جزیرے بالی گئی تھیں۔ وہاں پیش آنے والے ایک حادثے میں ان کی ریڑھ کی ہڈی میں فریکچر ہوگیا تھا۔ بیرونِ ملک ابتدائی طبی معائنے کے بعد انہیں مزید علاج اور سرجری کے لیے ایئر ایمبولینس کے ذریعے ممبئی منتقل کیا گیا۔ اداکارہ کی ٹیم نے اپنے بیان میں کہا کہ حادثے اور علاج کے ایک مشکل مرحلے سے گزرنے کے بعد نصرت اب تیزی سے صحت یاب ہورہی ہیں۔ بیان کے مطابق، وہ گھر واپس آچکی ہیں، جہاں ان کی اچھی طرح دیکھ بھال کی جارہی ہے۔ ٹیم نے اس دوران محبت، فکر، دعاؤں اور نیک تمناؤں کا اظہار کرنے والے تمام افراد کا شکریہ بھی ادا کیا۔ نصرت نے حال ہی میں سوشل میڈیا پر اسپتال میں قیام کی ایک مختصر ویڈیو بھی شیئر کی تھی۔ اس میں وہ طبی عملے کی مدد سے شاہ رخ خان اور کاجول پر فلمائے گئے مشہور رومانوی گیت ’گیروا‘ سے لطف اندوز ہوتی دکھائی دیں۔ اس ویڈیو کے ذریعے اداکارہ نے اپنے مداحوں کو اپنی طبیعت کے بارے میں بھی آگاہ کیا تھا۔ اس سے قبل نصرت نے اپنے خیر خواہوں کا شکریہ ادا کرتے ہوئے کہا تھا کہ وہ مثبت سوچ کے ساتھ علاج جاری رکھے ہوئے ہیں اور بتدریج صحت یاب ہورہی ہیں۔ ان کی ٹیم نے بھی مکمل صحت یابی کے لیے صبر اور آرام کی اہمیت پر زور دیا ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل