ریت اور گرد کے طوفان موسمیاتی بم بن چکے، اقوام متحدہ نے خطرے کی گھنٹی بجا دی

اقوامِ متحدہ نے خبردار کیا ہے کہ ریت اور گرد کے طوفان موسمیاتی تبدیلی کے باعث دنیا بھر میں سنگین بحران کی صورت میں بم بن چکے ہیں، جن سے اس وقت 150 ممالک میں 33 کروڑ سے زائد افراد متاثر ہو رہے ہیں۔ خلیجی خبر رساں ادارے کی خبر کے مطابق اقوامِ متحدہ کے ذیلی ادارے عالمی موسمیاتی تنظیم (WMO) کی تازہ ترین رپورٹ کے مطابق ان طوفانوں کے نتیجے میں ہر سال 70 لاکھ افراد قبل از وقت موت کا شکار ہو رہے ہیں۔ چشم کشا رپورٹ میں بتایا گیا کہ فضاء میں موجود گرد کے ذرات سانس اور دل کی مہلک بیماریوں، فصلوں کی پیداوار میں کمی، بھوک اور آبادی کی ہجرت کا باعث بن رہے ہیں۔ اقوام متحدہ نے ریت اور گرد کے طوفانوں سے نمٹنے کے لیے 2025 سے 2034 کے عرصے کو دہائی برائے انسداد گرد و غبار قرار دے دیا ہے۔ اقوام متحدہ کی جنرل اسمبلی کے صدر فیلیمن یانگ نے کہا کہ یہ طوفان ہماری دنیا کے سب سے نظرانداز مگر سب سے خطرناک بحرانوں میں شامل ہو چکے ہیں۔ یہ صرف گرد آلود فضاء نہیں بلکہ انسانی زندگی، معیشت اور خوراک کے لیے زہر بن چکے ہیں۔ ڈبلیو ایم او کی نمائندہ لاورا پیٹرسن نے بتایا کہ دنیا بھر میں ہر سال تقریباً 2 ارب ٹن گرد خارج ہوتی ہے جو وزن میں تقریباً 300 اہرام مصر کے برابر ہے۔ ان میں سے 80 فیصد گرد افریقہ اور مشرقِ وسطیٰ کے صحراؤں سے اٹھتی ہے، جو ہوا کے ذریعے براعظموں اور سمندروں کو عبور کرتی ہے۔ اقوام متحدہ کے اقتصادی و سماجی کمیشن برائے مغربی ایشیا کی سربراہ رولا دشتی نے کہا کہ گرد و غبار کے طوفانوں سے مشرقِ وسطیٰ اور شمالی افریقہ کو سالانہ 150 ارب ڈالر (2.5% جی ڈی پی) کا نقصان ہوتا ہے۔ انہوں نے بتایا کہ صرف رواں موسمِ بہار میں عراق، کویت اور ایران میں شدید طوفانوں کے باعث اسپتال مریضوں سے بھر گئے، جبکہ اسکول اور دفاتر بند کرنا پڑے۔ ڈبلیو ایم او کی سیکرٹری جنرل سیلسٹے ساؤلو نے کہا کہ یہ صرف گندے شیشے اور دھندلی فضاء نہیں بلکہ کروڑوں انسانوں کی صحت، زندگی اور معیشت کو براہ راست خطرہ ہے۔ ماہرین نے خبردار کیا ہے کہ اگر فوری اقدامات نہ کیے گئے تو یہ ماحولیاتی بحران آئندہ دہائیوں میں انسانیت، معیشت اور کرۂ ارض کے لیے ناقابل تلافی نقصان کا باعث بن سکتا ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل