راولپنڈی: شوہر نے دو بیٹوں سے مل کر اہلیہ کو قتل کرکے لاش دفنادی، ملزمان گرفتار

خاوند نے دو بیٹوں کے ساتھ مل کر اہلیہ کو غیرت کے نام پر قتل کرکے لاش ویرانے میں دفنا دی، ہونے والے بہو نے راز افشاں کردیا، پولیس نے ملزمان کو گرفتار کرکے لاش برآمد کرلی۔ ایکسپریس نیوز کے مطابق راولپنڈی کے تھانہ روات کے علاقے تگڑے مندہال میں افسوسناک واقعہ پیش آیا ہے جس میں خاوند نے بیٹوں کے ساتھ مل کر اہلیہ کو قتل کرکے نعش ویرانے میں دفنا دی۔ ہونے والی بہو نے ملزمان کا اقدام دیکھ کر سنگین جرم بے نقاب کردیا۔ مقتولہ کے بھائی کے بیان پر روات پولیس نے مقدمہ درج کرکے تینوں باپ بیٹوں کو گرفتار کرلیا۔ پولیس کے مطابق مقتولہ کی لاش بازیاب کرلی گئی ہے۔  مقتولہ کے بھائی مدعی زاہد خان کے مطابق ہمشیرہ مسماتہ نگینہ کی شادی 30 سال قبل فضل مالک سے انجام پائی، شادی سے ہمشیرہ کے دو بیٹے اور تین بیٹیاں ہیں، ڈیڑھ سال قبل بھانجی ماہ نور کی شادی فضل مالک کے دوسرے بیٹے زبیر سے طے پائی، 15 جولائی کو بھانجی ڈر و خوف کی وجہ سے روات سے بھاگ کر اپنے والد کے پاس پشاور آگئی۔ بھانجی نے بتایا کہ فضل مالک نے مسماتہ نگینہ پر مبینہ بدچلنی کا الزام عائد کیا اور میرے سامنے پہلے زہر دے کر اور پھر سر میں ڈنڈے مار کر اسے قتل کردیا، ملزمان لاش کو لے کر نامعلوم مقام پر  چلے گیے۔ پولیس نے ملزمان کے خلاف غیرت کے نام پر قتل کا مقدمہ درج کرلیا، ملزم فضل مالک سمیت اس کے دو بیٹوں کو گرفتار کرکے ویرانے میں اس مقام پر لے گئے جہاں ملزمان نے متقولہ کو دفنایا تھا، کھدائی کے بعد وہاں سے لاش برآمد ہوئی، مزید تفتیش شروع کردی گئی۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل