کراچی میں بوندا باندی سے موسم خوشگوار؛ آئندہ 3 دن بادلوں کا راج ہوگا

شہر قائد میں آج علی الصبح سے مختلف علاقوں میں بوندا باندی سے موسم خوشگوار ہو گیا جب کہ آئندہ 3 دن شہر پر بادل چھائے رہیں گے۔ محکمہ موسمیات نے پیش گوئی کی ہے کہ کراچی میں آئندہ 3 روز کے دوران موسم زیادہ تر ابرآلود رہنے کا امکان ہے، جب کہ مختلف علاقوں میں ہلکی بارش یا بوندا باندی ہو سکتی ہے۔ ماہرین کا اس حوالے سے کہنا ہے کہ شہر میں سمندری ہوائیں بدستور چلتی رہیں گی اور درجہ حرارت 31 سے 33 ڈگری سینٹی گریڈ کے درمیان رہنے کی توقع ہے، جس سے موسم مرطوب اور قدرے خوشگوار رہ سکتا ہے۔ صوبہ سندھ کے بیشتر علاقوں میں بھی مطلع جزوی طور پر ابرآلود اور مرطوب رہنے کا امکان ظاہر کیا گیا ہے۔ محکمہ موسمیات نے تھرپارکر، بدین اور ٹھٹھہ کے علاقوں میں ہلکی بارش یا بوندا باندی کی پیش گوئی کی ہے، جس سے مقامی سطح پر موسم میں تبدیلی آ سکتی ہے۔ دوسری جانب ملک کے بالائی علاقوں میں ہونے والی حالیہ بارشوں کے اثرات سندھ کے دریائی نظام پر بھی ظاہر ہو رہے ہیں۔ گڈو بیراج اور سکھر بیراج میں نچلے درجے کا سیلاب ریکارڈ کیا گیا ہے، جب کہ کوٹری بیراج پر پانی کا بہاؤ فی الحال معمول کے مطابق ہے۔ محکمہ آبپاشی اور ضلعی انتظامیہ صورتحال پر گہری نظر رکھے ہوئے ہیں تاکہ کسی بھی ہنگامی صورتحال سے بروقت نمٹا جا سکے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل