فلک شبیر جیسے لوگوں کا دماغ کب خواتین کے کپڑوں سے نکلے گا، حنا پرویز بٹ کا سخت ردعمل

گلوکار فلک شبیر کی جانب سے عوامی مقامات پر مختصر لباس کے خلاف قانون سازی کی اپیل کے بعد سوشل میڈیا پر شروع ہونے والی بحث میں اب سیاسی شخصیات بھی شامل ہو گئی ہیں۔ مسلم لیگ (ن) کی رہنما حنا پرویز بٹ نے فلک شبیر کے مؤقف پر شدید تنقید کرتے ہوئے کہا ہے کہ بعض لوگوں کی توجہ اب بھی خواتین کے لباس سے ہٹنے کا نام نہیں لے رہی۔ حنا پرویز بٹ نے سوشل میڈیا پلیٹ فارم ایکس پر اپنے بیان میں لکھا کہ سمجھ نہیں آتی فلک شبیر جیسے افراد کا ذہن خواتین کے لباس سے کب نکلے گا۔ انہوں نے کہا کہ دنیا کے مختلف ممالک میں لوگ اپنی زندگیوں اور ذمہ داریوں پر توجہ دیتے ہیں، لیکن پاکستان میں اکثر لوگ سوشل میڈیا پر آ کر خواتین کے لباس پر تبصرے کرنا شروع کر دیتے ہیں۔ لیگی رہنما نے اپنی پوسٹ میں استنبول کی مثال دیتے ہوئے کہا کہ وہاں خواتین کے لباس پر غیر ضروری بحث نہیں کی جاتی، جبکہ پاکستان میں اس قسم کے موضوعات کو بلاوجہ اہمیت دی جاتی ہے۔ ان کے مطابق ایسی سوچ اور رویے معاشرتی ترقی کی راہ میں رکاوٹ بنتے ہیں۔         View this post on Instagram                       انہوں نے مزید کہا کہ اگر لوگ دوسروں کی ذاتی زندگیوں اور لباس پر رائے دینے کے بجائے اپنے معاملات پر توجہ دیں تو یہ معاشرے کے لیے زیادہ مفید ہوگا۔ یہ تنازع اس وقت شروع ہوا جب فلک شبیر نے سوشل میڈیا پر مریم نواز سے مطالبہ کیا کہ پنجاب میں عوامی مقامات، بازاروں اور سڑکوں پر مختصر لباس پہننے والوں کے حوالے سے قانون متعارف کروایا جائے۔ گلوکار نے اپنی اپیل میں کہا تھا کہ بطور دو بیٹیوں کے والد وہ سمجھتے ہیں کہ ایسا قانون ثقافتی اقدار کے تحفظ کے لیے ضروری ہے۔ فلک شبیر کے بیان کے بعد سوشل میڈیا پر ملا جلا ردعمل سامنے آیا۔ بعض صارفین نے ان کی حمایت کی، جبکہ بڑی تعداد نے اسے ذاتی آزادیوں اور خواتین کے انتخاب کے حق میں مداخلت قرار دیتے ہوئے تنقید کا نشانہ بنایا۔ اس معاملے پر اداکارہ سارہ خان کی جانب سے بھی فلک شبیر کے مؤقف کے دفاع کے بعد بحث مزید شدت اختیار کر گئی۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل