ایران کا آئی اے ای اے سربراہ پر جانبداری کا الزام، امریکا پر بھی اعتماد کو نقصان پہنچانے کا دعویٰ

تہران: ایران نے اقوام متحدہ کے جوہری نگران ادارے  کے ڈائریکٹر جنرل رافیل ماریانو گروسی پر ایران کے خلاف ’دانستہ جانبداری‘ کا الزام عائد کرتے ہوئے کہا ہے کہ ان کے مؤقف سے ادارے کی ساکھ متاثر ہو رہی ہے۔ ایرانی وزارت خارجہ کے ترجمان اسماعیل بقائی نے ایک پریس کانفرنس کے دوران کہا کہ آئی اے ای اے کے سربراہ جاری تنازع کے حقائق کو نظر انداز کر رہے ہیں اور ایران کے جوہری پروگرام کے حوالے سے متعصبانہ رویہ اختیار کیے ہوئے ہیں۔ انہوں نے کہا کہ ادارے کے ڈائریکٹر جنرل جانبدارانہ طرز عمل اپنا رہے ہیں اور ایران کے جوہری معاملے میں دانستہ طور پر ایران مخالف مؤقف اختیار کر رہے ہیں۔ اسماعیل بقائی نے ایران اور امریکا کے درمیان جاری سفارتی رابطوں پر بھی بات کرتے ہوئے کہا کہ گزشتہ 24 گھنٹوں کے واقعات نے دونوں ممالک کے درمیان پہلے سے موجود شکوک و شبہات میں مزید اضافہ کر دیا ہے۔ انہوں نے دعویٰ کیا کہ ایران اور پاکستانی ثالث کی جانب سے بارہا اس بات پر زور دیا گیا ہے کہ لبنان سے متعلق معاملات مجوزہ جنگ بندی یا کسی بھی ممکنہ معاہدے کا لازمی حصہ ہیں، اور ایران کسی صورت اسرائیل یا امریکا کو اس حصے کو کمزور کرنے کی اجازت نہیں دے گا۔ ایرانی ترجمان کے مطابق امریکا کے متضاد بیانات اور پالیسیوں نے سفارتی عمل کو پہلے ہی پیچیدہ بنا دیا تھا، جبکہ حالیہ پیش رفت نے صورتحال کو مزید غیر یقینی بنا دیا ہے۔ بقائی کا کہنا تھا کہ امریکا اور ایران کے درمیان پیغامات کا تبادلہ پہلے ہی شدید بداعتمادی کے ماحول میں جاری تھا، اور حالیہ واقعات اس سفارتی عمل میں مزید مشکلات پیدا کر سکتے ہیں۔ تاہم آئی اے ای اے، امریکا یا دیگر متعلقہ فریقوں کی جانب سے ایرانی الزامات پر فوری ردعمل سامنے نہیں آیا۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل