میر رضا علی کے انصاف کیلیے کراچی میں سول سوسائٹی کا احتجاج

پی ای سی ایچ ایس کے رہائشی نوجوان میر رضا کے انصاف کیلیے شہریوں اور سول سوسائٹی کی جانب سے شارع فیصل نرسری کے قریب احتجاج مظاہرہ کیا گیا۔ شارع فیصل نرسری کے قریب لگاتار پانچویں روز شہریوں کی بڑی تعداد جمع ہوئی جس میں انہوں نے رضا کو انصاف دو کے نعرے لگائے۔ مظاہرین نے اپنے ہاتھوں میں پلے کارڈز اٹھائے ہوئے تھے میں جس پر میر رضا کے اہلخانہ کو انصاف فراہم کرنے اور اس کے قاتلوں کو گرفتار کرنے کے مطالبات درج تھے۔ خواتین اور لڑکیاں آج بھی احتجاج میں شریک ہوئیں اور انہوں نے بھی مقتول کے اہل خانہ کو انصاف کی فراہمی جبکہ کیس کی شفاف تحقیقات کا مطالبہ دہرایا۔ اس موقع پر مظاہرین کا کہنا تھا کہ میر رضا کا قتل ہوا ہے جسے مبینہ طور پر خودکشی کا رنگ دیا جا رہا ہے جبکہ پوسٹ مارٹم بھی ٹھیک طریقے سے نہیں کیا گیا اور اب دوبارہ سے قبرکشائی کر کے میر رضا کی میت نکال کر دوبارہ پوسٹ مارٹم کیا جائیگا۔  مظاہرین کا کہنا تھا کہ ہمارا مطالبہ ہے کہ میر رضا کے اہل خانہ کو انصاف ملے اور اس واقعے کی غیر جانبدار تحقیقات کرائی جائے اور اس کے قتل میں جو بھی ملوث ہے اس گرفتار کیا جائے۔ مظاہرے میں شامل ایک شخص کا کہنا تھا کہ میر رضا میرے بیٹے کا کلاس فیلو اور بچوں جیسا تھا اس کی بہیمانہ موت کی شفاف تحقیقات کرائی جائے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل