اجوائن کے آسان نسخے، گیس اور بدہضمی سے نجات میں مددگار

جنک فوڈ اور باہر کے کھانوں کا بڑھتا ہوا استعمال اکثر لوگوں کے لیے گیس، پیٹ پھولنے، سوزش اور تیزابیت جیسے مسائل کا سبب بنتا ہے۔ اگرچہ ان شکایات کی صورت میں بہت سے افراد فوری طور پر ادویات کا استعمال شروع کردیتے ہیں، تاہم بعض گھریلو طریقے بھی ہاضمے سے متعلق معمولی مسائل میں مددگار ثابت ہوسکتے ہیں۔ اجوائن ان ہی گھریلو اجزا میں شامل ہے جسے ہاضمے کے مسائل کے لیے روایتی طور پر استعمال کیا جاتا رہا ہے۔ اجوائن میں موجود جراثیم کش خصوصیات معدے کے لیے مفید سمجھی جاتی ہیں جبکہ یہ نظامِ ہاضمہ کو متوازن رکھنے اور ہاضمے کے عمل کو بہتر بنانے میں بھی معاون ہوسکتی ہے۔ اجوائن کو تیزابیت، گیس، بدہضمی، پیٹ پھولنے اور پیٹ درد جیسی شکایات میں بھی استعمال کیا جاتا ہے۔ اجوائن کو لیموں کے رس کے ساتھ استعمال کرنا ایک عام گھریلو طریقہ ہے۔ اس مقصد کے لیے اجوائن اور لیموں کا رس ملا کر اس میں ایک چٹکی کالا نمک شامل کیا جاتا ہے۔ رپورٹ کے مطابق یہ آمیزہ دن میں دو مرتبہ استعمال کیا جاسکتا ہے اور گیس کے باعث پیٹ پھولنے کی شکایت میں بھی مددگار ہوسکتا ہے۔ اجوائن کو ادرک کے ساتھ بھی استعمال کیا جاتا ہے۔ اجوائن میں موجود فعال اجزا گیس، سوزش اور بدہضمی کی علامات کم کرنے میں معاون سمجھے جاتے ہیں، جبکہ یہ میٹابولزم بہتر بنانے اور جسمانی چربی کم کرنے میں بھی مددگار ہوسکتی ہے۔ اس مشروب کی تیاری کے لیے اجوائن اور خشک ادرک کو پیس کر پاؤڈر بنائیں، ایک کپ پانی میں ایک چائے کا چمچ یہ پاؤڈر شامل کرکے اچھی طرح ملائیں اور آخر میں ایک چٹکی کالا نمک ڈال دیں۔ اجوائن کی چائے بھی بدہضمی اور گیس کی شکایت میں استعمال کی جاتی ہے۔ اس کے لیے ایک کپ پانی میں ایک چائے کا چمچ اجوائن کے بیج ڈال کر اچھی طرح ابالیں، پانی ابلنے کے بعد اس میں تھوڑا سا نمک شامل کرکے چھان لیں۔ رپورٹ میں اجوائن کے پانی میں موجود الیکٹرولائٹس کے ذریعے جسم میں پانی کی کمی دور کرنے کی بات بھی کی گئی ہے، جبکہ اسے آنکھوں کی صحت کے لیے بھی مفید قرار دیا جاتا ہے۔ بدہضمی اور گیس سے متعلق شکایات میں اجوائن اور ہینگ کا امتزاج بھی استعمال کیا جاتا ہے۔ اس طریقے کے لیے آدھا چائے کا چمچ اجوائن کے بیج، تین سے چار انچ ہینگ اور ایک چٹکی کالا نمک لیا جاتا ہے۔ تمام اجزا کو ملا کر چبایا جاتا ہے اور پھر پانی کے ساتھ نگل لیا جاتا ہے۔ اجوائن کو کسی الگ نسخے کے بجائے روزمرہ کھانوں کا حصہ بھی بنایا جاسکتا ہے۔ اسے مختلف پکوانوں میں ذائقے کے لیے مصالحے کے طور پر استعمال کرنے کے علاوہ آٹے میں بھی شامل کیا جاسکتا ہے۔ البتہ پیٹ کی مسلسل، شدید یا بار بار ہونے والی تکلیف کو صرف گھریلو نسخوں سے نظرانداز نہیں کرنا چاہیے۔ ایسی صورت میں اصل وجہ معلوم کرنے کے لیے طبی ماہر سے مشورہ ضروری ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل