کولوراڈو میں امریکی فوج کا بلیک ہاک ہیلی کاپٹر تباہ، 4 افراد معجزانہ طور پر محفوظ

کولوراڈو: امریکی فوج کا بلیک ہاک ہیلی کاپٹر ریاست کولوراڈو کے پہاڑی اور جنگلاتی علاقے میں حادثے کا شکار ہوکر تباہ ہوگیا، تاہم ہیلی کاپٹر میں سوار چاروں افراد محفوظ رہے اور کسی جانی نقصان کی اطلاع نہیں ملی۔ امریکی میڈیا کے مطابق یہ حادثہ کولوراڈو کے گولڈن گیٹ کینیون اسٹیٹ پارک کے شمال میں واقع جنگلاتی علاقے میں پیش آیا۔ امریکی فوج کے بلیک ہاک ہیلی کاپٹر کو تربیتی مشق کے دوران ایک غیر متوقع لینڈنگ کرنا پڑی، جس کے دوران وہ حادثے کا شکار ہوگیا۔ حکام کے مطابق ہیلی کاپٹر میں مجموعی طور پر چار افراد سوار تھے۔ حادثے کے بعد ان تمام افراد کی حفاظت کی تصدیق کردی گئی اور کسی کے ہلاک یا شدید زخمی ہونے کی اطلاع سامنے نہیں آئی۔ امریکی فوج کے ترجمان نے واقعے کو ایک حادثہ قرار دیتے ہوئے بتایا کہ یہ تربیتی سرگرمی کے دوران پیش آیا۔ تاہم ابتدائی اطلاعات میں حادثے کی اصل وجہ واضح نہیں ہوسکی اور واقعے کی مزید تحقیقات جاری ہیں۔ حادثے کے بعد امدادی اور متعلقہ حکام نے جنگلاتی علاقے میں ہیلی کاپٹر کے ملبے کی تلاش شروع کی۔ بعد ازاں حادثے کا شکار ہونے والے بلیک ہاک ہیلی کاپٹر کا ملبہ جنگل میں تلاش کرلیا گیا۔ بلیک ہاک امریکی فوج کے اہم فوجی ہیلی کاپٹروں میں شمار ہوتا ہے اور اسے مختلف فوجی، نقل و حمل اور تربیتی کارروائیوں کے لیے استعمال کیا جاتا ہے۔ اس نوعیت کے ہیلی کاپٹر دشوار گزار اور پہاڑی علاقوں میں بھی فوجی مشقوں کا حصہ بنتے ہیں۔ امریکی میڈیا کے مطابق حادثے کا شکار ہونے والے بلیک ہاک ہیلی کاپٹر کی مالیت تقریباً 3 کروڑ سے 3 کروڑ 30 لاکھ ڈالر بتائی گئی ہے۔ حادثے کے نتیجے میں ہیلی کاپٹر کو شدید نقصان پہنچا اور اس کا ملبہ جنگلاتی علاقے میں پھیل گیا۔ حکام کی جانب سے حادثے کی مکمل وجوہات اور ہیلی کاپٹر کو پہنچنے والے نقصان کی تفصیلات تحقیقات مکمل ہونے کے بعد سامنے آنے کا امکان ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل