سیاحوں کیلئے سب سے زیادہ پرکشش ممالک کی فہرست سامنے آگئی، پہلے نمبر پر کونسا ملک ہے؟

سیاحوں کو اپنے طرف  متوجہ کرنے والے ممالک میں وہاں کی ثقافت اور تاریخی ورثہ بڑی اہمیت رکھتا ہے اور یہ پہلو اس ملک کی سیر کرنے والوں کے لیے ناقابل فراموش ہوتا ہے اور وہ مذکورہ ممالک کے لیے سیاحت کے لیے دوسروں کو بھی راغب کرتے ہیں۔ یو ایس نیوز اینڈ ورلڈ رپورٹ نے دنیا بھر کے سروے کی بنیاد پر 40 ایسے ممالک کی فہرست جاری کردی ہے اور ان ممالک کی درجہ بندی بھی کردی گئی ہے اور سروے میں حصہ لینے والے افراد نے ان ممالک کو دنیا کے بہترین ثقافتی اور تاریخی ورثے کے حامل قرار دیا ہے۔ رپورٹ میں بتایا گیا کہ دنیا بھر میں کئے گئے اس سروے میں 17 ہزار افراد سے مختلف سوالات پوچھے گئے جن میں 5 اہم پہلو ثقافتی رسائی، تاریخی اہمیت، کھانے، خوب صورتی اور جغرافیائی انفرادیت شامل تھے اور جوابات کی روشنی میں ان ممالک کی درجہ بندی کی گئی ہے۔ یو ایس نیوز اینڈ ورلڈ سروے کے نتائج مطابق یونان کو دنیا کا بہترین ثقافتی اور تاریخی ورثے کا حامل ملک قرار دیا گیا ہے اور اس کی وجہ وہاں کی تاریخی انفرادیت بھی ہے۔ جمہوریت، مغربی فلسفے اور اولمپک گیمز جنم بھومی یونان سروے میں حصہ لینے والے افراد کے لیے دنیا میں سب سے زیادہ اہمیت رکھنے والا ملک ہے۔ سروے میں حصہ لینے والے افراد نے یونان کے کھانوں، جغرافیہ اور تاریخی مقامات تک رسائی کے اقدامات کو سراہا۔ رپورٹ میں بتایا گیا کہ یونان کا سیاحتی شعبہ دیگر شعبوں کے مقابلے میں کامیابی کی داستان ہے اور سیاحت کےسیزن میں وہاں کے مختلف علاقوں غیرملکیوں اور مقامی سیاحوں سے کھچاکھچ بھرا ہوا ہوتا ہے۔ اس فہرست میں یورپی ممالک کی تعداد سب سے زیادہ ہے اور پہلے 10 ممالک میں سے 7 یورپی ممالک ہیں، جن میں یونان کے علاوہ اٹلی، اسپین، فرانس اور ترکیے جیسے ممالک شامل ہیں۔ یورپ کے مذکورہ ممالک اقوام متحدہ کے عالمی ورثے میں شامل بےشمار مقامات اور ورثے سے مالامال ہیں، یہاں کی بادشاہتوں کی طویل داستایں، مذاہب اور فنون کی روایت بھی دوسرے ممالک سے ممتاز کرتی ہیں۔   ان 40 ممالک میں ایشیا سے بھی چند ممالک کو جگہ دی گئی ہے، اور سرفہرست 15 ممالک میں تھائی لینڈ، بھارت اور جاپان کو شامل کیا گیا ہے۔ تھائی لینڈ کو ان کی روایات اور کھانوں، بھارت کو مذہبی مقامات اور آرکیٹکچرل ورثے کی وجہ سے ان بہترین ممالک میں شمار کیا گیا ہے، جاپان کو تمام پانچوں شعبوں میں لوگوں کی مثبت رائے کی وجہ سے سرفہرست ممالک میں جگہ ملی ہے۔ دنیا کے بہترین ثقافتی ورثے کے حامل ممالک کو مذکورہ سروے کے تحت درج ذیل نمبرز میں جگہ دی گئی ہے۔ پہلے نمبر پر یونان، دوسرے نمبر پر اٹلی، تیسرے نمبر پر اسپین، چوتھے نمبر پر فرانس، پانچویں نمبر پر ترکیہ، چھٹے نمبر پر میکسیکو، ساتویں نمبر پر مصر، آٹھویں نمبر پر تھائی لینڈ، نویں نمبر پر پرتگال اور دسویں نمبر پر بھارت کا نام ہے۔ اسی طرح جاپان 11، برازیل 12، چین 13، مراکش 14، برطانیہ 15، آئرلینڈ 16، ارجنٹینا 17، آسٹریا 18، امریکا 19 اور آسٹریلیا 20 نمبر پر موجود ہیں۔ انڈونیشیا 21، نیوزی لینڈ 22، جرمنی 23، ویتنام 24، پیرو 25، جنوبی افریقا 26، نیدرلینڈز 27، ملائیشیا 28، سوئٹزرلینڈ 29 اور کینیڈا 30 واں ملک ہے۔ دنیا کے بہترین 40 ممالک میں ناروے کا نمبر 31 واں، جنوبی کوریا کا 32 واں، بیلجیم کا 33واں، سنگاپور کا 34 واں، چلی کا 35 واں، فلپائن کا 36 واں، سعودی عرب کا 37 واں، ہنگری کا 38 واں، روس کا 39 واں اور کروشیا کا 40 واں نمبر ہے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل