اسرائیل کیخلاف جنگ میں پاکستان کی حمایت کبھی نہیں بھول سکتے، ایرانی صدر

ایرانی صدر مسعود پزشکیان نے کہا ہے کہ اسرائیل کے خلاف جنگ میں پاکستان کی حمایت کبھی نہیں بھول سکتے۔ وفاقی وزیر داخلہ محسن نقوی نے دارالحکومت تہران میں  ایرانی صدر مسعود پزشکیان سے اہم ملاقات کی، جس میں باہمی دلچسپی کے امور سمیت پاک ایران تعلقات اور دوطرفہ تعاون پر تبادلہ خیال کیا گیا۔ وزیر داخلہ محسن نقوی نے ایرانی صدر مسعود پزشکیان کو اسرائیل کے خلاف جنگ میں عظیم  فتح کی مبارک باد دی اور کہا کہ ایران کے سپریم لیڈر  سمیت پوری قوم نے جارحیت کا خلاف ڈٹ کر مقابلہ کیا۔ خامنہ ای کی دانشمندانہ قیادت اور آپ کی بہترین حکمت عملی  نے جنگ میں فیصلہ کن کردار ادا کیا، جو  امت مسلمہ کے لیے باعثِ فخر ہے۔ محسن نقوی نے کہا کہ پاکستان نے ایران پر حملے کی ہر فورم پر پر زور مذمت کی۔ پاکستانی پارلیمنٹ نے سب سے پہلے ایران پر جنگ مسلط کرنے کے خلاف مذمتی قرارداد منظور کی اور ایران کے اپنے دفاع کے جائز حق کی حمایت کی۔ انہوں نے وزیراعظم  شہباز شریف کی جانب سے ایرانی  صدر مسعود پزشکیان کو نیک خواہشات اور احترام کا پیغام  پہنچایا۔ ایرانی صدر مسعود پزشکیان نے اس موقع پر کہا کہ پاکستان کے ساتھ اپنے تعلقات کو انتہائی اہمیت دیتے ہیں۔ پاکستان نے جنگ کے دوران جس طرح ساتھ دیا وہ کبھی نہیں بھول سکتے۔صہیونی حکومت  مسلم ممالک کے درمیان تقسیم اور کمزوری پیدا کرنے کی کوشش کر رہی ہے۔ انہوں نے کہا کہ  اسلامی ممالک کے درمیان اتحاد اور ہم آہنگی  ناگزیر  ہے۔ مسلم حکومتیں  اسلامی اتحاد کی اہمیت کو پوری طرح سمجھ جائیں تو وہ صہیونی حکومت کے خلاف ایک متحد محاذ بنا سکتی ہیں۔ صدر مسعود پزشکیان نے ایران اور پاکستان کے درمیان موجودہ دو طرفہ تعلقات پر اطمینان کا اظہار کیا۔ انہوں نے دونوں ممالک کے درمیان جامع تعاون کو  وسیع کرنے کے لیے سفارتی تبادلوں اور تعمیری مکالمے کی اہمیت پر زور دیا۔ مسعود پزشکیان نے اسرائیلی مسلط کردہ جنگ کے دوران پاکستان کی مخلصانہ حمایت پر  شکریہ ادا کیا اور کہا کہ   دونوں ممالک کے پاس تعاون کو فروغ دینے کے بے پناہ مواقع موجود ہیں۔ اس اہم ملاقات میں ایرانی وزیر داخلہ سکندر مومنی، ایرانی صدر کے معاون خصوصی، پاکستان میں ایران کے سفیر  اور ایران میں پاکستان کے سفیر بھی موجود تھے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل