7 ڈمپرز جلنے کا واقعہ: کراچی پولیس نے متعدد نوجوانوں کو حراست میں لے لیا

راشد منہاس روڈ پر ٹمپر کے نیچے کچل کر بہن بھائی کے جاں بحق ہونے کے بعد مشتعل افراد کی جانب سے 7 ڈمپرز کو نذر آتش کیے جانے کے واقعے کی تحقیقات کے سلسلے میں ڈسٹرکٹ سینٹرل پولیس نے  فیڈرل بی ایریا بلاک 16 ، 14 سمیت دیگر بلاکوں میں ہوٹلز اور پارکوں میں چھاپے مار کر متعدد نوجوانوں کو حراست میں لے لیا۔ ڈسٹرکٹ سینٹرل پولیس نے پیر کی الصبح فیڈرل بی ایریا بلاک 16 ، 14 سمیت دیگر بلاکوں میں ہوٹلز اور پارکوں میں چھاپے مار کر متعدد نوجوانوں کو حراست میں لے کر گبول ٹاؤن، یوسف پلازہ، نیوکراچی انڈسٹریل ایریا اور یوسف پلازہ تھانے منتقل کر دیا۔ حراست میں لیے جانے والوں کے والدین، رشتے دار اور دوست احباب تھانے پہنچ گئے تاہم ان کو تھانوں میں داخل ہونے کی اجازت نہیں دی گئی اور تھانوں کے گیٹ بند کر دیے گئے۔ واضح رہے راشد منہاس روڈ پر ڈمپر سے بہن بھائی کے کچل کر جاں بحق ہونے کے بعد مشتعل شہریوں نے 7 ڈمپرز کو آگ لگا دی تھی۔ ڈمپر ایسوسی ایشن کے عہدیداروں سے ملاقات کے بعد ایڈیشنل آئی جی کراچی اور دیگر پولیس افسران نے ڈمپرز کو آگ لگانے والوں کو گرفتار کرنے کا فیصلہ کیا ہے خصوصاً جائے حادثے کے قریبی رہائشی عمارت صغیر سینٹر کے مکینوں کی مبینہ گرفتاری کا فیصلہ کیا گیا ہے، پولیس نے حراست میں لیے جانے والے کسی شخص کی تصدیق نہیں کی۔ دو روز قبل فیڈرل بی ایریا میں لکی ون شاپنگ مال کے قریب ایک تیز رفتار ڈمپر نے موٹر سائیکل پر سوار افراد کو کچل دیا تھا، حادثے میں شدید زخمی ہونے والے دونوں بہن بھائی اسپتال منتقل کیے گئے مگر وہ جانبر نہ ہوسکے تھے، جبکہ ڈمپر کی ٹکر سے والد زخمی ہوا۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل