مغربی کنارے میں ملٹری چیک پوسٹ پر فلسطینی نوجوان کا حملہ؛ 2 اسرائیلی فوجی ہلاک اور 8 زخمی

مغربی کنارے میں ایک فلسطینی نوجوان نے اسرائیلی ملٹری چیک پوسٹ پر حملہ کردیا تھا جہاں ایک کمانڈر سمیت 11 اہلکار موجود تھے۔ عالمی خبر رساں ادارے کے مطابق مغربی کنارے کے علاقے تیاسیر میں اسرائیلی فوج کی چیک پوسٹ پر حملے میں 2 اسرائیلی فوجی مارے گئے۔ فلسطینی نوجوان کے حملے میں اسرائیلی فوج کے 8 اہلکار زخمی بھی ہوئے جن میں سے 2 کی حالت نازک ہونے کے باعث ہلاکتوں میں اضافے کا خدشہ ہے۔ حملہ آور چیک پوسٹ پر اسرائیلی فوجیوں کو زیر کرنے کے بعد ملٹری کمپاؤنڈ میں داخل ہوگیا اور وہاں بھی اہلکاروں سے جھڑپ ہوئی۔ ملٹری کمپاؤنڈ میں بھی اسرائیلی فوج حملہ آور کو روکنے میں ناکام ثابت ہوئی ہے۔ حملہ آور فوجیوں کو چکمہ دینے میں کامیاب ہوگیا۔ اسرائیلی فوج کا کہنا ہے کہ حملہ آور کافی دیر تک کمپاؤنڈ میں موجود رہا اور چھپ چھپ کر فائرنگ کرتا رہا۔ مزید نفری طلب کی گئی جس نے حملہ آور کو گولیاں مار کر قتل کردیا۔ اسرائیلی فوج کی فائرنگ میں شہید ہونے والا نوجوان فلسطینی شہری کے پاس ایم-نائن گن تھی۔ نوجوان کی شناخت کا عمل تاحال جاری ہے۔ یاد رہے کہ غزہ میں جنگ بندی کے بعد اسرائیلی فوج نے مغربی کنارے کا رخ کرلیا ہے۔ جہاں مزاحمت کاروں سے گھمسان کی جھڑپیں جاری ہیں۔ گزشتہ ایک برس کے دوران مغربی کنارے میں ان جھڑپوں کے دوران 800 سے زائد فلسطینی شہید ہوچکے ہیں جب کہ 40 سے زائد اسرائیلی فوجی اور شہری بھی مارے گئے۔    

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل