ایران کیلیے جاسوسی پر برطانوی فوجی کو 14 سال قید کی سزا

برطانیہ میں سابق فوجی 23 سالہ ڈینیئل عابد خلیف کو ایران کے لیے جاسوسی کے الزام میں مجموعی طور پر 14 سال قید کی سزا سنائی گئی۔ عالمی خبر رساں ادارے کے مطابق برطانیہ کی عدالت نے 23 سالہ ڈینیئل خلیف کو 3 ماہ قبل ایران کے لیے جاسوسی، دہشت گردی اور جیل سے فرار ہونے کا مجرم قرار دیا تھا۔ حالانکہ ڈینیئل نے عدالت نے دعویٰ کیا تھا کہ اُس نے یہ سب برطانوی سیکیورٹی ایجنسیوں کی مدد کے لیے ڈبل ایجنٹ کے طور پر کام کرنے کی کوشش میں کیا تھا۔ خیال رہے کہ ڈینیئل ستمبر 2023ء میں باورچی کا روپ دھار کر جیل سے کھانا ڈیلیوری کرنے والے ٹرک میں چھپ کر فرار ہوا تھا اور اسے 3 دن کی تلاش کے بعد دوبارہ حراست میں لیا گیا۔ یہ خبر پڑھیں : برطانیہ باورچی کے بھیس میں جیل سے فرار ہونے والا سابق فوجی 3 دن بعد گرفتار برطانوی فوج کا حصہ ہوتے ہوئے بھی ڈینیئل نے ایران کی خفیہ ایجنسی کے اہلکاروں کو فیس بک کے ذریعے اہم اور حساس معلومات فراہم کی تھیں۔ برطانیہ کی کراؤن پراسیکیوشن سروس کے مطابق ڈینیئل خلیف نے فیس بک پر ایران سے وابستہ ایک ’’مڈل مین‘‘ کو پیغامات بھیجے اور اپنی وفاداری کا یقین دلایا۔ ڈینیئل نے اس شخص کو کہا کہ وہ 25 سال سے زیادہ عرصے تک برطانوی فوج میں خفیہ طور پر ایران کے لیے کام کرتا رہے گا۔ استغاثہ نے عدالت کو بتایا تھا کہ یہ "ایک مذموم کھیل" ہے۔ ڈینیئل ستمبر میں باورچی کا روپ دھار کر کھانے کے ٹرک کے ذریعے جیل سے فرار ہوا تھا اور تین کی تلاش کے بعد پولیس کے ہتھے چڑھا۔ ڈینیئل نے فیس بک پر ایران کی خفیہ ایجنسی اور بعض ایسی شخصیات کے ساتھ روابط استوار کیے جنھیں برطانیہ نے دہشت گرد قرار دیا ہوا ہے۔ پراسیکیوشن کا مزید کہنا تھا کہ ڈٖینیئل نے فرضی دستاویزات کے علاوہ کچھ حقیقی فوجی دستاویزات بھی اُس ’’مڈل مین‘‘ کو بھیجیں۔ جس میں اسپیشل فورسز کے سپاہیوں کی ذاتی تفصیلات بھی شامل ہیں۔ انھوں نے مزید بتایا کہ ڈینیئل نے ایرانی شخص سے بدلے میں اس کام کے لیے کتے کے فضلے والے بیگ میں 1500 پاؤنڈ وصول کیے تھے۔ دوسری جانب ڈینیئل خلیف کا کہنا تھا کہ وہ ایک ایرانی ماں اور لبنانی والد کا بیٹا ہے جو برطانیہ میں پلا بڑھا اور خود کو ایک محب وطن انگریز سمجھتا ہے۔ ڈینیئل نے مزید کہا کہ اس نے چند فوجی دستاویز محض ایرانی ایجنٹ کا اعتبار حاصل کرنے کے لیے بھیجی تھیں اور اس کے سوار جتنے بھی کاغذات بھیجے وہ فرضی تھے۔ سابق فوجی نے کہا کہ میری خواہش تھی کہ میں اس طرح اُس ایرانی شخص اعتماد حاصل کرکے برطانوی فوج میں موجود ایرانی جاسوسوں کی شناخت کرواسکوں۔ تاہم عدالت نے ڈینیئل کے عمل کو خود نمائی قرار دیتے ہوئے ان دلائل کو مسترد کردیا تھا اور آج لندن میں وول وچ کراؤن کورٹ نے سزا سنا دی۔ جسٹس چیما گرب نے ڈینیئل کو جاسوسی اور دہشت گردی کے الزام میں چھ چھ برس جب کہ جیل سے فرار ہونے پر 2 سال قید کی سزا سنائی۔  

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل