پی ٹی آئی قیادت کا پارٹی معاملات میڈیا میں لانے والوں سے رابطے ختم کرنے کا فیصلہ

پاکستان تحریک انصاف کی مرکزی قیادت نے ناراض ارکان کے ساتھ جاری مذاکراتی عمل روکنے کا فیصلہ کر لیا ہے اور پارٹی کی پارلیمانی و سیاسی رابطہ کمیٹی کو واضح ہدایات جاری کر دی ہیں۔ پارٹی اعلامیے کے مطابق ایسے ارکان سے کسی قسم کا رابطہ نہ کرنے کی ہدایت کی گئی ہے جو پارٹی کے اندرونی معاملات کو میڈیا میں زیر بحث لا رہے ہیں یا عوامی بیانات کے ذریعے قیادت پر دباؤ ڈالنے کی کوشش کر رہے ہیں۔ اعلامیے میں کہا گیا ہے کہ پارٹی نظم و ضبط کو کمزور کرنے یا میڈیا کے ذریعے اپنے مطالبات منوانے کی کوشش کرنے والوں کی حوصلہ افزائی نہیں کی جائے گی۔ قیادت کا مؤقف ہے کہ اندرونی اختلافات اور شکایات کے حل کے لیے پارٹی کے اپنے فورمز موجود ہیں اس لیے تمام معاملات انہی پلیٹ فارمز پر اٹھائے جائیں۔ پی ٹی آئی نے واضح کیا ہے کہ جن ارکان اسمبلی کو کسی قسم کے تحفظات یا مسائل درپیش ہیں ان کی شکایات سنی جا رہی ہیں اور مناسب پارٹی فورمز کے ذریعے ان کا حل بھی نکالا جائے گا۔ اعلامیے کے مطابق پارٹی قیادت نظم و ضبط اور تنظیمی ڈھانچے کو برقرار رکھنے کے لیے پُرعزم ہے اور ایسے طرزِ عمل کی حوصلہ شکنی کی جائے گی جو پارٹی کے داخلی معاملات کو عوامی سطح پر لے جانے کا باعث بنے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل