ہم اسلام آباد ضرور آئیں گے مگر احتجاج پرامن ہوگا، بیرسٹر گوہر

پی ٹی آئی چیئرمین بیرسٹر گوہر علی خان نے کہا ہے کہ انصاف نہ ملے، بات نہ سنی جائے اور اس پر احتجاج نہ کرنے کا مطالبہ کیسے کیا جاسکتا ہے؟ لانگ مارچ ضرور ہوگا ہم اسلام آباد آئیں گے مگر احتجاج پرامن ہوگا۔ پارلیمنٹ کے باہر میڈیا سے گفت گو میں انہوں نے کہا کہ پی ٹی آئی قیادت اور پارلیمانی پارٹی کی ملاقاتیں ہوئیں، بعد ازاں پریس کانفرنسز بھی کی گئیں، معاملات کو بہتری کی طرف لے جانے کے لیے ہمیشہ کوشش کی اور مفاہمت کا راستہ کبھی بند نہیں کیا۔ بیرسٹر گوہر نے کہا کہ انصاف نہ ملے، بات نہ سنی جائے اور مطالبات کو ایڈریس نہ کیا جائے تو صرف احتجاج نہ کرنے کا مطالبہ کیسے کیا جا سکتا ہے؟ عدالتی احکامات پر عمل درآمد نہ ہو اور ملاقاتوں و علاج کے معاملات بھی حل نہ کیے جائیں تو حالات کیسے بہتر ہوں گے؟ جمہوری معاشروں میں بہتری زبانی دعووں سے نہیں بلکہ عملی اقدامات سے آتی ہے۔ چیئرمین پی ٹی آئی نے کہا کہ ریاست سنجیدہ ہے تو عملی اقدامات کرے، ہمیں محسوس ہونا چاہیے کہ ہمارے مطالبات کو سنجیدگی سے لیا جا رہا ہے، 27 ستمبر کا لانگ مارچ ان شاء اللہ ضرور ہوگا، مکمل طور پر پرامن ہوگا، ہم اسلام آباد کی طرف آئیں گے، اسلام آباد میں داخلے کے بعد بھی پرامن ماحول برقرار رکھا جائے گا، لانگ مارچ اسلام آباد پہنچے گا اسٹال لگے ہوں گے میلے کا سماں ہوگا۔ بیرسٹر گوہر نے کہا کہ پی ٹی آئی نے مفاہمت کا راستہ کبھی بند نہیں کیا، رابطے آج بھی موجود ہیں مگر بانی چیئرمین کے خاندان کی خواتین اور پارٹی کارکنوں سے متعلق اقدامات پر ہمارے تحفظات ہیں،  ریاست کو اپنے اقدامات پر نظرثانی کرنی چاہیے، موجودہ صورتحال سے ریاست اور جمہوریت کو نقصان ہوگا،  پاکستان ہمارا ہے اسلام آباد بھی ہمارا ہے ہمیں ووٹ دینے والے عوام کے راستے میں رکاوٹیں نہیں ہونی چاہئیں،  پی ٹی آئی نے رابطوں اور مذاکرات سے کبھی انکار نہیں کیا،  جب تک انصاف نہیں ملتا اور بنیادی مطالبات پر پیش رفت نہیں ہوتی، سیاسی جدوجہد جاری رہے گی۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل