فلوٹیلا پر اسرائیلی حملے کا خدشہ، فون جام ہو سکتا ہے سفر نہیں، مشتاق احمد خان کا ویڈیو پیغام

غزہ کے لیے امدادی مشن پر روانہ گلوبل صمود فلوٹیلا اسرائیلی بحریہ کے نشانے پر آ گئی ہے۔ قافلے میں شامل پاکستان کے سابق سینیٹر مشتاق احمد خان نے ایک ویڈیو پیغام میں خدشہ ظاہر کیا ہے کہ آج رات فلوٹیلا پر اسرائیل کی جانب سے حملہ کیا جا سکتا ہے۔ سماجی رابطے کے پلیٹ فارم ایکس (ٹوئٹر) پر جاری کردہ ویڈیو میں مشتاق احمد خان نے بتایا کہ دور سے اسرائیلی جنگی جہاز نظر آنا شروع ہو چکے ہیں، جس کے بعد حملے کا امکان مزید بڑھ گیا ہے۔ انہوں نے کہا کہ ہم نے ہنگامی صورتحال کے پیشِ نظر حفاظتی جیکٹس پہن لی ہیں، لیکن ہمارا سفر رکے گا نہیں۔ ہم غزہ سے مزید قریب ہو گئے ہیں اور اب ہمیں دور سے اسرائیلی جہاز اپنی جانب آتے دکھائی دے رہے ہیں۔ عین ممکن ہے کہ آج رات ہم پر حملہ کیا جائے۔ میرا موبائل پہلے ہی اسرائیل نے جام کر دیا ہے لہذا اب اس ناکارہ فون کو میں سمندر برد کرتا ہوں۔ آپ سب سے یہی اپیل ہے جو میں گزشتہ ڈیڑھ سال سے… pic.twitter.com/0fHTSzokH4 — Senator Mushtaq Ahmad Khan | سینیٹر مشتاق احمد خان (@SenatorMushtaq) September 30, 2025 اپنے پیغام میں مشتاق احمد خان نے دعویٰ کیا کہ اسرائیل نے ان کا موبائل فون جام کر دیا ہے، جس کے باعث وہ گزشتہ 36 گھنٹوں سے کسی سے رابطے میں نہیں ہیں ان کا کہنا تھا کہ اسرائیل میرا فون جام کرسکتا ہے، لیکن غزہ کی طرف ہمارا سفر نہیں روک سکتا۔ اس جملے کے ساتھ ہی انہوں نے اپنا موبائل فون سمندر میں پھینک دیا، جس کی ویڈیو بھی سوشل میڈیا پر وائرل ہو رہی ہے۔ انہوں نے کہا کہ چاہے ہم سمندر میں مچھلیوں کی خوراک بن جائیں یا اسرائیلی ڈرون کا نشانہ، ہم پیچھے نہیں ہٹیں گے۔ غزہ کی طرف سفر جاری رہے گا۔ ساتھ ہی انہوں نے پاکستانی عوام سے اپیل کی کہ اگر آپ غزہ نہیں جا سکتے تو اسلام آباد میں امریکی سفارتخانے کے سامنے پرامن احتجاج کریں اور فلسطینی عوام کے ساتھ یکجہتی کا مظاہرہ کریں۔ یاد رہے کہ اسرائیل نے اس سے قبل غزہ کے لیے امداد لانے والی کشتیوں میڈلین اور حنظلہ کو بھی روک لیا تھا۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل