عمران خان نے کہا ہے مذاکرات قوم کے مفاد میں کروں گا اپنی ذات کیلئے نہیں، علیمہ خان

بانی پی ٹی آئی عمران خان کی بہن علیمہ خان نے کہا ہے کہ عمران خان کہتے ہیں مذاکرات قوم کے مفاد کے لیے کروں گا، اپنی ذات کے لیے ڈیل نہیں کروں گا۔ انسداد دہشت گردی عدالت راولپنڈی کے باہر میڈیا سے گفتگو کرتے ہوئے ان کا کہنا تھا کہ ہمارے بھائی اور بھانجے کو ناجائز قید میں رکھا گیا ہے، ہمارا فوکس بے گناہ قیدیوں کی رہائی ہے، مہنگائی کا ہم سب شکار ہیں عمران خان کی حکومت کو گرایا گیا اب مہنگائی کیلئے عوام کو خود نکلنا ہوگا، ظلم کے نظام کے خلاف خود لوگوں کو کھڑا ہونا ہوگا ہم سب کو چاہیے کہ بوسیدہ نظام کے خلاف کھڑے ہوں۔ علیمہ خان نے کہا کہ بانی پی ٹی آئی عمران خان کہتے ہیں مذاکرات قوم کے مفاد کے لیے کروں گا، بانی نے کہا ہے اپنی ذات کے لیے ڈیل نہیں کروں گا، بانی پی ٹی آئی نے سخت پیغام بھیجا ہے کہ ذاتی لڑائیاں ختم کریں اور تحریک چلائیں، بانی مشکل حالت میں ہیں پارٹی اس پر بات کرے۔ ان کا کہنا تھا کہ بانی کو توڑنے کے لیے بشریٰ بی بی کے خلاف کارروائیاں کی جارہی ہیں، بانی پی ٹی آئی کھڑے ہیں ہم سب کو بھی کھڑا ہونا ہوگا، بانی کی زندگی خطرے میں ہے ہم سپریم کورٹ میں جائیں گے، جیل سپرنٹںڈنٹ جھوٹا آدمی ہے میرا بھائی جھوٹ نہیں بولتا، اخبارات اور ٹی وی بند کرکے انہیں قید تنہائی میں ڈالا گیا ہے، جیل سپرنٹنڈنٹ میں انسانیت نام کی چیز نہیں ہے، مریم نواز نے بانی پی ٹی آئی پر ظلم کروانے کے لیے اس سپرٹنڈنٹ کو بھیجا ہے۔ قبل ازیں عدالت میں سماعت کے دوران عدالت نے آر پی او راولپنڈی کو علیمہ خان کے تمام مقدمات کا ریکارڈ پیش کرنے کے احکامات جاری کردیے۔

اگر آپ اس خبر کے بارے میں مزید معلومات حاصل کرنا چاہتے ہیں تو نیچے دیے گئے لنک پر کلک کریں۔

مزید تفصیل